Qazaqstanda kóshi-qon saıasaty túbegeıli transformasııadan ótip, ákimshilik sıpattaǵy quraldan ekonomıkalyq damýdyń mańyzdy tetigine aınalady. Bul týraly Premer-mınıstrdiń orynbasary – Mádenıet jáne aqparat mınıstri Aıda Balaeva málimdedi, dep habarlaıdy Egemen.kz.
Mınıstr Prezıdent Jarlyǵyn iske asyrý aıasyndaǵy Úkimettiń negizgi tásilderi men basym baǵyttaryn keńinen túsindirip ótti. Onyń aıtýynsha, bul qujat kóshi-qon saıasatyn jańa deńgeıge kóteretin mańyzdy qadam jáne ony júzege asyrý barlyq memlekettik organdardyń úılesimdi jumysyn talap etedi.
«Qarapaıym tilmen aıtqanda, biz burynǵy kúrdeli ári shekteýlerge toly júıeden birtindep bas tartyp, ashyq ári ıkemdi modelge kóship jatyrmyz. Basty maqsat – otandyq ekonomıkaǵa qajetti mamandar úshin qolaıly kóshi-qon júıesin qalyptastyrý», dep atap ótti Aıda Balaeva.
Kóshi-qon saıasatyndaǵy tórt negizgi baǵyt:
1. Servıstik memleket qalyptastyrý:
Bul baǵyt memlekettik qyzmetterdiń qarapaıym ári qoljetimdi bolýyn kózdeıdi. «Bir tereze» qaǵıdatyn keńeıtý, prosesterdi tolyq sıfrlandyrý jáne vedomstvoaralyq kelisimderdi qysqartý arqyly mártebe rásimdeý men jumysqa ruqsat alý birtutas júıe arqyly júzege asyrylady.
Kóshi-qon saıasaty ózgeredi: Oljas Bektenov mınıstrlerge naqty mindetter júktedi
2. Bıýrokratııadan aryltý:
Ákimshilik prosesterdiń tıimdiligin arttyrý maqsatynda ótinishterdi qaraý merzimderi qysqaryp, rásimder ońtaılandyrylady. Sıfrlyq baqylaý quraldaryn engizý azamattar men memleket úshin ýaqyt pen resýrstardy únemdeýge múmkindik beredi.
3. «Altyn vıza» jáne adamı kapıtaldy tartý:
Investorlar men joǵary bilikti mamandar úshin «Altyn vıza» tetigi engiziledi. Bul óndiris nemese ınfraqurylym salasyndaǵy ınvestorlarǵa uzaq merzimdi turaqty qyzmet etý múmkindigin beredi. Sondaı-aq ınjenerııa, IT jáne medısına salasyndaǵy mamandardyń eńbek naryǵyna shyǵýy jeńildetilmek.
4. Eńbek naryǵynyń ıkemdiligi:
Kadr tapshylyǵy bar jáne joǵary tehnologııalyq salalarda kásibı biliktilikti taný rásimderi jeńildetiledi. Keı jaǵdaılarda biliktilikti rastaý merzimderi aıtarlyqtaı qysqartylyp, bul rette sapa men qaýipsizdik talaptary tolyq saqtalady.
Mınıstrdiń aıtýynsha, memleket retteýdi álsiretpeıdi, kerisinshe ony naqty, dál jáne tehnologııalyq turǵydan tıimdi etedi. Strategııalyq turǵydan bul reformalar Qazaqstannyń ınvestısııa, tehnologııa jáne adamı kapıtal úshin jahandyq básekedegi ornyn kúsheıtýge baǵyttalǵan. Bul bilimge negizdelgen ekonomıkany damytý men sapaly ósýdi qamtamasyz etý jolyndaǵy mańyzdy qadam bolmaq.