PAVLODAR. 14 mamyr.Pavlodar oblysyndaǵy Baıanaýyl ulttyq tabıǵat saıabaǵynyń dırektory Bolat Rahmetov pen bólim basshysy Qasymtaı Imanov ulttyq saıabaqtyń Shonaı aýylyndaǵy shtab-páterinde keńes ótkizer aldynda qamaýǵa alyndy. Bul týraly pavlodarnews.kz deregine súıengen egemen.kz tilshisi habarlady.
Atalmysh habardy Baıanaýyl aýdany ákiminiń orynbasary Abaı Dáýletqalıev rastady.
«Rasynda osydan eki kún buryn osyndaı oqıǵa oryn aldy. Qolda naqty aqparatymyz joq. Sondyqtan eshteńe aıta almaımyn. Dırektor Bolat Rahmetov pen bólim basshysy Qasymtaı Imanovty quzyrly mekeme qyzmetkerleri alyp ketti. Al keshe bólim basshysy bosatyldy», - dedi ol.
Laýazymdy tulǵalardy qamaýǵa alý oqıǵasynyń kýágeri, ulttyq park aýmaǵyndaǵy bir demalys úıi dırektorynyń orynbasary agenttikke bergen suhbatynda sol sátte Bolat Rahmetov olardy týrıstik maýsymnyń ashylýyna daıyndyqqa arnalǵan jıynǵa shaqyrǵan.
«Biz ulttyq parktiń shtab-páteri ornalasqan Shonaı aýylyna saǵat 14.30-da keldik. Birshama kútip qaldyq, jınalystyń bastalatyn túri joq. Bir kezde Ekibastuz óńiri boıynsha jemqorlyqqa qarsy kúres jáne memlekettik ister jónindegi aýdanaralyq basqarmasy mamandary kelip, qujattaryn kórsetti. Keıin parktiń dırektoryn qamaýǵa alǵandaryn málimdedi. Al demalys oryndarynyń basshylaryn kabınetterdiń birine qamap, úsh saǵat boıy ustady. Ashý bildirdik. Bizdi keshke bir-aq jiberdi», dedi kýáger.
Eske sala keteıik, Bolat Rahmetov memlekettik parktiń dırektory qyzmetin eki jylǵa jýyq ýaqyt atqardy. Buǵan deıin 10 jyl boıy Baıanaýyl aýdany ákiminiń orynbasary bolyp jumys istegen.
Farıda Byqaı.
Derek, sýret: pavlodarnews.kz.