ORAL. 28 aqpan. Batys Qazaqstan oblystyq qylmystyq ister jónindegi mamandandyrylǵan aýdan aralyq sotynda adam ólimine ákelip soqtyrǵan qylmystyq is qaraldy. Bul týraly Batys Qazaqstan oblystyq sotynyń baspasóz qyzmeti habarlady.
Atalǵan sottyń úkimimen aýyr qylmys jasaǵan Sh.Jumaǵalıev QR Qylmystyq kodeksiniń 96-baby 1-bólimimen aıypty dep tanyldy. Soǵan sáıkes aıyptyǵa 10 jyl bas bostandyǵynan aıyrý jóninde jaza belgilendi. Ol óziniń jazasyn qatań tártiptegi kolonııada óteıdi.
Qandy oqıǵa tómendegishe óris alǵan. Joǵaryda atalǵan sottalýshy eń aldymen óziniń tanysymen birge araq ishedi. Qýaty joǵary ishimdiktiń ýyty boılaryna taraı bastaǵannan keıin ekeýi ózara qatty sózge kelip qalady. Osy kezde óziniń is-qımylyna esep berýden qalǵan Sh.Jumaǵalıev ústeldiń ústindegi as úı pyshaǵyna jarmasady. Kelesi bir sátte osy pyshaqpen jábirlenýshiniń moıyn tusyna aýyr soqqy jasaıdy. Tanysy sol jerde esinen tanyp qalady. Áıtse de kózi qaraıǵan basbuzar muny da mise tutpaı, jábirlenýshiniń tamaǵy men kúretamyryn kesip jiberedi. Aýyr jaraqattan tanysy sol jerde ólip ketti.
Temir Qusaıyn.
Derek: Batys Qazaqstan oblystyq sotynyń baspasóz qyzmeti.
Sýret: sud.gov.kz.