Jany qalaıtyn isin tabysty kásipke aınaldyrý árkimniń qolynan kele bermeıtini anyq. Bul az ýaqyt ishinde «Taýdaı bol» saýda belgisiniń ónimderin tanymal brendke aınaldyrǵan Jannur Momyshqa jaqsy tanys.
Kishkentaıynan pisirgen tamaǵy til úıiretin Jannur keıin osy isti kásipke aınaldyrýdy kóp oılanypty. Onyń talabyn qoldaǵan azamaty muzdatqysh kamera satyp áperip, Jannur tapsyryspen túshpara men manty ázirlep sata bastaıdy. Alǵash bolyp tapsyrys bergen kórshileriniń suranysy is aıasyn kún saıyn keńeıe berýge sep bolypty. Kásipte alǵashqy tabysqa toqmeıilsigenderdiń deni kóp uzamaı toqyraýǵa tap bolady. Jannur izdene júrip áleýmettik jeliden úı jaǵdaıynda shujyq jasaýǵa qyzyǵýshylyǵy oıandy.
«Shujyq jasaýǵa úıretetin arnaıy kýrstar Aqtaý qalasynan tabyldy. Qymbattaý bolsa da, azamatym qajetti aqshany taýyp berip, talabymdy qoldady. Úsh satyly oqýdan keıin jańa kásipti bastadyq. Osydan 3 jyl buryn jeke kásipker retinde tirkelip, oblys ortalyǵynan shaǵyn ǵımaratty jalǵa aldyq. Shujyq ónimderi men jartylaı fabrıkattar shyǵaratyn sehqa qajetti qural-jabdyqtardy alýǵa «Damý» kásipkerlikti damytý qorynan jeńildetilgen nesıe aldym. «Taýdaı bol» brendimen ónim shyǵarý isi osylaı bastaldy», deıdi kásipker.
Ýaqyt óte kele tapsyrys kóbeıip, óndiris aıasyn keńeıtý qajet boldy. Bul joly da Jannur memleket qoldaýyna arqa súıegenin aıtady. 2021–2025 jyldarǵa arnalǵan kásipkerlikti damytý ulttyq jobasy men «Coca Cola belesteri» bastamasy aıasynda jańa bıznes ıdeıalardy júzege asyrýǵa múmkindik beretin jeńildetilgen grant utyp aldy. Memleket qoldaýy tek qural-jabdyq satyp alýdan bólek isti josparlaýda da serpin berdi.
О́nim tanymal bolý úshin sapasyna syn kelmeýi kerek. Sondyqtan da ol sehqa qajetti shıkizatty Jalaǵash aýdanyndaǵy senimdi fermerlerden ǵana satyp alady. Árbir et partııasy qatań tekserýden ótedi. Tutynýshylar senimine ıe bolǵan «Taýdaı bol» saýda belgisimen óndiriletin shujyq ónimderi men jartylaı fabrıkattar oblys ortalyǵyndaǵy 16 dúkenniń sóresinen oryn tepken. Kásipker alda ónim túrlerin kóbeıte túsýdi josparlap otyrǵanyn aıtady. Elimizden bólek syrttan da tutynýshylar tabý baǵytynda izdenis bar.
«Tumar» shaǵyn ónerkásip aımaǵynan 20 túrli kondıter ónimin shyǵaratyn jańa sehyn iske qosqan kásipker memleket tarapynan kórsetilip jatqan qoldaý sharalary onyń isin ilgeriletýge dem berip otyrǵanyn aıtady. Búginde eki sehta 11 adam turaqty jumyspen qamtylsa, alda óndiristi keńeıtip, taǵy bir saýda núktesin ashý josparda bar. Talaby bıik «Taýdaı bol» bul údeden kórinetinine senim mol.
«Isińe adal bolyp, alǵan betińnen taımasań, tabysqa jetesiń. Memleket árdaıym qoldaý jasap, túrli bıznes ıdeıany júzege asyrýǵa múmkindik jasap keledi», deıdi kásip ıesi.
Qyzylorda