17 maýsymda Almatyda aralas jekpe-jekten ótetin ASA-205 týrnırinde Artem Reznıkovtiń (26-11) qarsylasy belgili boldy. «Spartak» degen búrkenshik esimmen tanylǵan otandasymyz Zaýr «El Pantera» Gadjıevpen (13-5) kúsh synasady. Artemge bul jarysta mindetti túrde jeńiske jetý qajet. Sebebi ol sońǵy jeti básekeniń beseýinde jeńilistiń kermek dámin tatty. Endi «Spartak» taǵy bir ret utylsa, onda atalǵan promoýshennen ketýi múmkin.
Bul kúnderi Fılıppınde voleıboldan áıelder arasynda Azııanyń Ulttar kýbogi ótip jatyr. Tusaýkeser kezdesýde Qazaqstan quramasy Gonkongti utty – 3:1 (20:25, 25:17, 25:16, 25:13). Kelesi kezdesýde Indonezııany taza jeńdi – 3:0 (25:19, 25:19, 25:18. Úshinshi týrda Irandy tize búktirdi – 3:1 (13:25, 25:20, 25:14, 25:18). Odan keıin Lıvannyń tas-talqanyn shyǵardy – 3:0 (25:11, 25:19. 25:14). Sońǵy matchta Vetnamǵa qarsy oınadyq. Favorıtterge qarsy ótken shıelenisti asa básekede bizdiń qyzdar tamasha oıyn úlgisin kórsetip, kúmánsiz jeńiske jetti – 3:2 (18:25, 25:19, 23:25, 25:22, 15:13). Sóıtip, óz tobynda birinshi oryn alǵan jerlesterimiz jartylaı fınalǵa joldama aldy. Al kelesi topta Ońtústik Koreıa men Taıpeı ozdy.
25 jastaǵy PSJ-nyń oıynshysy Hvıcha Kvarashelııa ÝEFA Chempıondar lıgasynyń eń úzdik oıynshysy dep tanyldy. О́z mansabyn Tbılısıdiń «Torpedosynda» bastaǵan Hvıcha ár kezderi Grýzııanyń «Rýstavı» men «Dınamo Batýmı», Máskeýdiń «Lokomotıv», Italııanyń «Napolı» klýbtarynda oınady. Byltyr Fransııaǵa qonys aýdaryp, PSJ-nyń jeıdesin kıdi. Vınger mindetin atqaryp júrgen ol parıjdik komandamen birge 42 ret jasyl alańǵa shyǵyp, 12 goldyń avtory atandy. Grýzııa quramasy sapynda 49 matchta qarsylastar qaqpasyn 22 ret dál kózdedi.
Bıylǵy maýsymdaǵy ÝEFA Chempıondar lıgasy PSJ-nyń jeńismen aıaqtalǵany belgili. Fınalda olar Londonnyń «Arsenalyn» penaltı soǵý barysynda (/1:1, 4:3) utty. Sheshýshi oıynda da Kvarashelııa gol soqty. Al ÝEFA-nyń shartty quramyna myna oıynshylar endi: Qaqpashy – Davıd Raııa («Arsenal»), Qorǵaýshylar – Nýný Mendesh (PSJ), Gabrıel Magalıaes («Arsenal»), Markınos (PSJ), Markos Lorente («Atletıko»). Jartylaı qorǵaýshylar – Hvıcha Kvarashelııa (PSJ), Vıtınıa (PSJ), Deklan Raıs («Arsenal»), Maıkl Olıse («Bavarııa»). Shabýylshylar – Garrı Keın («Bavarııa»), Ýsman Dembele (PSJ).