Qazirgi jastar ıslamdy jete túsine me?

Qazaqstannyń tarıhy men mádenıeti kóp ǵasyrlar boıy ıslam dinimen baılanysa damyp keledi. Islam dini qazaq halqynyń ózindik rýhanııaty men mádenıetiniń qalyptasýyndaǵy negizgi qaınarlardyń biri. Qa­zaq halqynyń arǵy tegi bolyp esepteletin kóne túrkiler ıslam­nyń qalyptasýy men kóptegen jetistikterine óz úlesterin qos­ty. Qazaq halqy óz tarıhynda dinı aǵymdarǵa bólinbegen já­ne ózge din ókilderine qatysty toleranttylyqty ustanǵan. So­nyń nátıjesinde, búginde Qa­zaqstan kóptegen ulttar men ulystardyń jáne dinderdiń yntymaǵy ornaǵan mekenge aınalyp otyr. Alaıda, osynaý yntymaq-birlikke qyzǵana qaraıtyn kózder de barshylyq. Keıbir jastarymyz radıkaldy kózqarastaǵy, patrıottyq sezimnen jurdaı bolǵan ártúrli aǵymdardyń qol shoqparyna aınalýda. Osynaý tarıhty qaıta jańǵyrtý, óskeleń urpaqty ótkenine kóz shaldyryp, sabaq aldyrtyp, erteńin oılaıtyn, eldigin saqtaıtyn patrıottyq qasıetterge baýlý maqsatynda Tarazda «Qazaqstan tarıhyndaǵy ıslam dininiń róli» atty ǵylymı-tájirıbelik konferensııa bolyp ótti. «Qazaq handyǵynyń qurylýy, onyń qurylymy, mádenıeti, dini, dili, resmı tili, ekonomıkalyq jaǵdaıy, saıası qalyptasýy, kórshi jáne shet memlekettermen baılanysy týraly áli de bolsa derekter jetkiliksiz. Mine, osy is-shara babalarymyzdyń máde­nıetin, dástúrli bolyp sanalǵan dinı ustanymymen tanysýǵa baǵyttalyp otyr. Osy sebepterdi negizge ala otyryp, bul konferensııada elimizge tanymal tarıhshy ǵalymdar óz eńbekterin usyndy», deıdi oblys ákiminiń orynbasary Erqanat Manjýov. Shynynda, jat dinderge boı aldyrmaı ata-babamyzdan mıras bolyp kelgen dástúrli dinimizdi qurmettep, babalar amanatyn keleshek urpaqqa jetkizý bizdiń bas­ty mindetimiz. Osy oraıda, eń aldymen, eldiń bolashaǵyna nuqsan keltiretin, kúndelikti ómirimizge, densaýlyǵymyz ben ómirge degen kózqarasymyzǵa zııan keltiretin dinı uıymdardyń jumysyna qar­sy turý arqyly dinı ekstremızm men terrorızmniń aldyn alý qajet. Jıynda Jambyl oblystyq din isteri basqarmasynyń bas­shysy J.Omarov, tarıh ǵylym­darynyń doktory, professor A.Abdýaly, L.Gýmılev atyndaǵy Eýrazııa ulttyq ýnıversıtetiniń professorlary M.Alpysbes, A.Izbaırov, elimizdiń Din isteri komıtetiniń Din máseleleri jónin­degi ǵyly­mı zertteý jáne taldaý ortaly­ǵynyń ǵylymı sarapshysy, dintanýshy, Phd doktory M. Isahan jáne basqa da ǵalymdar óz zertteýlerin ortaǵa salyp, jastarǵa oısalarlyq dúnıeler aıta bildi. Oralhan DÁÝIT, «Egemen Qazaqstan». TARAZ.