PETROPAVL. 19 mamyr. «Damý» kásipkerlikti damytý qory» AQ-nyń óńirlik fılıaly men kásipkerlerge qyzmet kórsetý ortalyǵy ásem de eńseli ǵımaratqa qonys aýdardy. Saltanatty sharaǵa oblys ákimi Erik Sultanov, «Damý» kásipkerlikti damytý qory» AQ basqarmasynyń tóraıymy Lázzat Ibragımova, jergilikti kásipkerler palatasynyń, ulttyq kompanııalardyń, bıznes qurylymdarynyń ókilderi qatysty. Bul týraly kásipkerlik basqarmasynyń mamandary habarlady.
Buǵan deıin «Damý» qorynyń óńirlik fılıaly men kásipkerlerge qyzmet kórsetý ortalyǵy ǵımaratty jalǵa alyp kelse, qazirgi nysannyń aýmaǵy – 1483,5 sharshy metr. Osy qordyń qarjylyq operatorlyǵymen «Bıznestiń jol kartasy – 2020» memlekettik baǵdarlamasy sheńberinde 386 aýmaqtyq jobaǵa 28,7 mıllıard teńge demeýqarjy berildi. Ortalyqtan 4 myńnan astam shaǵyn jáne orta bıznes ókilderi kómek alǵan. Aımaq basshysy óz sózinde kásipkerlik belsendiliktiń arta túskenin atap kórsetti. Byltyr 25 myńnan astam bıznes sýbektileri bolsa, bıyl 10 myńǵa kóbeıgen.
Jańa ǵımaratta aqyl-keńesten bastap semınar,trenıngterge deıin tegin ótkiziledi. L. Ibragımova «Báıterek» Ulttyq basqarýshy holdıngi» AQ ınvestısııalar tartý, klasterlerdi damytý jáne enshiles uıymdarda birlese basqarý júıesin jetildirý maqsatymen qurylǵanyn, oblystaǵy óńirlik fılıal men kásipkerlerge qyzmet kórsetý ortalyǵy respýblıkada úzdik úshtikke enetinin, paıdalanýǵa berilgen aýqymdy nysan qyzmet kórsetý aıasyn keńeıte túsetindigin jetkizdi.
Ǵımarattyń birinshi qabatyna kásipkerlerge qyzmet etý ortalyǵy ornalasqan. Onda 6 keńesshi men halyqqa qyzmet kórsetý ortalyǵy, «Turǵyn úı-qurylys jınaq banki» fılıaldarynyń, servıstik kompanııalardyń bólimderi «bir tereze» qaǵıdatymen jumys isteıdi.
Ekinshi qabatta «Damý» kásipkerlikti damytý qory» AQ-nyń bólimshesi oryn alǵan. Aqparattyq kezdesýler men oqytý sharalaryn ótkizýge arnalǵan kabınet 50 orynǵa laıyqtalǵan.
О́mir Esqalı.
Derek, sýret: Soltústik Qazaqstan oblystyq kásipkerlik basqarmasy.