Aqtóbe oblysynyń qylmystyq ister jónindegi mamandandyrylǵan aýdanaralyq sotynda V.Lıtvınovke qatysty jurtshylyqty dúr silkindirgen qylmystyq iske úkim jarııalandy. Aıyptaý qorytyndysy boıynsha 2012 jyldyń qyrkúıeginde jáne 2015 jyldyń qańtar aıynda azamat V.Lıtvınov Aqtóbe qalasynda asa aýyr sanattaǵy eki qylmys, ıaǵnı azamat R.Muhambetalın men azamatsha G.Korkınany qasaqana óltirý, sondaı-aq, sońǵysynyń múlkin urlaý qylmystaryn jasaǵan.
2012 jyldyń qyrkúıek aıynyń basynda V.Lıtvınov «Altaı» saýda úıine jeke kásipker azamat R.Muhambetalınge aıaq kıim satýshysy bolyp jumysqa ornalasqan. Baý-baqsha ýchaskesindegi spırtti ishimdik ishýden keıin aralaryndaǵy arazdyqty paıdalanyp, kásipkermen janjaldasyp, qasaqana keýdesine pyshaq salǵan. Jábirlenýshi alǵan jaraqattan qaıtys bolǵan. Odan keıin, ol sol kúni keshki ýaqytta jábirlenýshiniń máıitin qylmys quralymen birge atalǵan ýchaskege kómip tastaǵan.
Qany qaraıǵan qylmysker munymen de tynbaıdy. 2015 jyldyń 17 qańtarynda V.Lıtvınov úı telefonymen qońyraý shalamyn degen syltaýmen óziniń burynǵy tanysy azamatsha G.Korkınanyń úıine kiredi. Áńgime barysynda azamatsha onyń alkogoldi ishimdikterge jaqyn ekenin, jumysta joqtyǵyn aıtqan kezde ózine qatysty syndy jeke basyna til tıgizý dep qabyldap, kireberis bólmedegi shkaftyń ústinde jatqan baltany alyp, onyń basyna qasaqana 20-ǵa jýyq soqqy jasap, sonyń saldarynan jábirlenýshi qylmys bolǵan jerde qaza bolǵan. Odan keıin V.Lıtvınov jábirlenýshiniń páterindegi sóreden 3000 teńgeni, 25000 rýbldi, baǵasy 3000 teńge turatyn «Panasonic» markaly radıotelefonyn urlap ketken.
Sot úkimimen V.Lıtvınov birneshe ret qasaqana adam óltirgeni, bótenniń múlkin urlaǵany úshin kináli dep tanylyp, oǵan túpkilikti qatań rejimdegi túzeý kolonııasynda 18 jylǵa bas bostandyǵynan aıyrý jazasy taǵaıyndaldy.
Satybaldy Sáýirbaı,
«Egemen Qazaqstan».
Aqtóbe oblysy.