ASTANA. 5 sáýir. Tájikstan astanasy – Dýshanbede Ujymdyq qaýipsizdik týraly shart uıymyna (UQShU) múshe elder syrtqy ister mınıstrleri keńesiniń otyrysy ótti. Basqosýda elimizdiń Syrtqy ister mınıstri Erlan Ydyrysov uıymǵa múshe elderdiń ońtústik óńirlerinde sodyrlardyń shoǵyrlanýyna alańdaýshylyq bildirdi. Bul týraly ca-news.org habarlady.
«Aýǵanstan terrıtorııasynda «Islam memleketi» ókilderiniń paıda bolýyna baılanysty, ol jaqtaǵy jaǵdaıdyń aıtarlyqtaı ózgergenin atap ótken jón. Osy maqsatta biz atalǵan jaǵdaıdy UQShU sheńberinde saraptap, tyńǵylyqty zertteý jumystaryn júrgizý jáne osyǵan baılanysty aımaqta bolýy múmkin qaýiptiń aldyn alý úshin is-qımyldar algorıtmin daıyndaý týraly kelisimge keldik», – dedi vedomstvo basshysy.
Sondaı-aq, ol álemdegi turaqsyzdyqqa erekshe mán berip, qatysýshylardyń nazaryn aýdardy. Odan bólek, Erlan Ábilfaıyzuly uıymnyń beıbit sıpaty men oǵan múshe elderdiń kez kelgen máseleni syndarly jáne saıası jolmen sheshýge daıyn ekenin aıtty. Jıynda negizinen Ýkraına men Aýǵanstandaǵy jaǵdaı sóz boldy.
Jıyn qorytyndysy boıynsha jasalǵan málimdemeler tizimi men aldaǵy jospar bekitildi. Syrtqy ister mınıstrleriniń kelesi otyrysy UQShU Ujymdyq qaýipsizdik keńesiniń sessııasy qarsańynda taǵy da Dýshanbede ótedi. Basqosý 2015 jyldyń kúzinde ótedi dep josparlanýda.
Sonymen qatar, syrtqy ister mınıstrleri Tájikstan prezıdenti Emomalı Rahmonnyń qabyldaýynda boldy. UQShU-ǵa Armenııa, Belarýs, Qazaqstan, Qyrǵyzstan, Reseı jáne Tájikstan memleketteri múshe ekenin aıta keteıik.
Elaman Qońyr.
Derek, sýret: ca-news-org.