Qaraǵandy oblysyndaǵy Buqar jyraý aýdanynyń ortalyǵy Botaqara kentinde qazaq mektebiniń qurylysy tolyǵymen aıaqtaldy. Buryn balalar oqıtyn eski ǵımaratta jalpy bilim berý mekemesimen birge mýzyka mektebi de qatar ornalasyp, bul, árıne, kóptegen qıyndyqtar týǵyzyp kelgen edi. Ǵımarat ishi tar bolatyn, tipti, munda sport zaly da atymen bolǵan emes. Endi jańa mektep salynǵan soń uzaq jyldardan beri qordalanyp kelgen bul másele de oń sheshimin tapty.
Botaqaralyqtardyń mundaı qýanyshymen ortaqtasý úshin arnaıy kelgen oblys ákimi Nurmuhambet Ábdibekov mekteptiń saltanatty ashylý jıynynda quttyqtaý sóz sóıledi. «Sapaly bilim berý – álemdegi ozyq 30 eldiń qataryna qosylýdy murat etken bizdiń eldiń damýyna zor yqpalyn tıgizetin faktorlardyń biri. Eldiń bolashaǵy búgingi oqýshylardyń qolynda. Sondyqtan, Memleket basshysy jalpy bilim beretin júıeniń materıaldyq-tehnıkalyq bazasyn jańartyp otyrýǵa aıryqsha kóńil bóledi», – dedi óńir basshysy.
Jańa mektep bilim berýdi damytý memlekettik baǵdarlamasy boıynsha salyndy. Qurylysy 2014 jyly bastalǵan bilim mekemesiniń jalpy aýmaǵy 6 400 sharshy metrdi quraıdy. Úsh qabatty ǵımaratqa 464 bala erkin syıyp, oqı alady. Munda sheberhana, mýltımedııalyq, lıngafon kabınetteri, kásiptik baǵdarlyq zerthana, mamandandyrylǵan hımııa, fızıka jáne bıologııa kabınetteri bar. Sonymen qatar, sporttyq, oqý jáne akt zaldary, kitaphana, ashana jáne medısına kabıneti qarastyrylǵan. Bilim ordasynyń qurylysyna oblystyq bıýdjetten 902 mln. teńge qarjy jumsaldy.
Mekteptiń jaıly da jaryq synyptary otandyq jıhazben jabdyqtalǵan. Aýlasynda balalarǵa arnalǵan tórt jáne bir úlken sport alańqaıy bar. Qaýipsizdik sharalaryn saqtaý úshin barlyq jerge beıne-baqylaý kameralary ornatylǵan.
Jańa mektepte 522 balaǵa arnalǵan sabaqtar ekinshi jartyjyldyqtan bastap júrgiziledi. Munda 55 muǵalim jumys isteıtin bolady. Olardyń arasynda «Dıplommen – aýylǵa!» jobasy boıynsha kelgen jas mamandar da bar.
Qaırat ÁBILDINOV,
«Egemen Qazaqstan».
Qaraǵandy oblysy,
Buqar jyraý aýdany.