PETROPAVL. 1 aqpan. Soltústik Qazaqstan oblysynda anasy balasynyń tárbıesi men oqýyna salǵyrt qaraǵany úshin 14 847 teńge kóleminde aıyppul tóleýine týra keledi. Bul týraly oblystyq sottyń baspasóz qyzmetine silteme jasaǵan egemen tilshisi habarlady.
Petropavl qalasynyń turǵyny óziniń ata-analyq mindetin bosańsytyp alǵanyn moıyndap, aldaǵy ýaqytta mundaı aǵattyqtarǵa jol berilmeıtinine sendirgenimen, kámeletke tolmaǵandar isi jónindegi mamandandyrylǵan aýdanaralyq sot oǵan ákimshilik jaza taǵaıyndaýdy jón dep tapty.
Qurylys-ekonomıkalyq kolledjinde oqıtyn onyń uly oqýǵa degen qulqynyń joǵyn syltaýratyp, byltyrǵy jyldyń jeltoqsan aıynda ǵana 21 kún sabaqqa kelmeı qalǵan.
Stýdenttiń anasy Ákimshilik kodekstiń 127-baby boıynsha kináli dep tanylyp, aıyppul tóleý jazasyna tartyldy.
О́mir Esqalı.
Derek: Soltústik Qazaqstan oblystyq sotynyń baspasóz qyzmeti.
Sýret: odessit.ua.