Bas basylymnyń bir bıigi

*Quttyqtaımyz!

«Jańa ómirimizdiń – táýel­sizdigimizdiń tarıhyn óz betinde jazýǵa «Egemen Qazaqstan» uly qyzmet atqardy. Táýelsizdik jo­lyndaǵy kúres Nursultandaı uly qaıratkerdi qalaı ysyldyryp shyǵarsa, «Egemen» onyń batyl qadamdary men oı-pikirlerin tartynbaı, jaltaqtamaı halqyna jetkizip turdy. Sóıtip, táýelsizdik pen táýelsizdik ıdeıasy osy gazet­tiń betinde tabysty. Áli de solaı! «Egemen» óz mindetin erlikpen atqarýda» – ótken jyly «El gazeti» atty maqalasynda akademık Serik Qırabaev osylaı degen edi. Ádebıet abyzynyń bul baǵa­synda bas basylymdy sońǵy on alty jyl boıy basqaryp kelgen  «Egemen Qazaqstan» respýb­lıkalyq gazeti» aksıonerlik qoǵamynyń prezıdenti Saýytbek Abdrahmanovtyń sheshýshi úlesi bar dep aıtýdyń artyqtyǵy joq. «Egemen Qazaqstannyń» S.Abdrahmanov basylym tizginin ustaǵan 2000 jylǵy 38 myńdyq taralymnan 2016 jylǵy 210 myńdyq taralymǵa jetýi, eń bastysy – oıy ornyqty, sózi salmaqty, baǵasy baıypty basylym retinde túpkilikti tanylýy,  shyn máninde el gazetine aınalýy, gazet basshysynyń óz sózimen aıtqanda, «kún saıyn árip túzetken, tún saıyn qarip kúzetken» janqııarlyq eńbektiń arqasy ekenin biz jaqsy bilemiz. Solaı ete júre ózi de san alýan taqyryptarǵa úzbeı qalam siltep otyrǵan S.Abdrahmanov shyǵarmashylyq ujymdy bir úıdiń balasyndaı, bir qoldyń salasyndaı uıymshyl etip ustaı bildi, ár adamǵa qamqorlyq jasaı aldy. El basshylyǵy aldyndaǵy abyroıynyń arqasynda redak­sııaǵa jeti qabattyq sáýletti ja­ńa ǵımarat turǵyzýdyń kiltin tabý, eki birdeı kóp páterli úı, eki birdeı jataqhana saldyryp, sol arqyly aksıonerlik qoǵam qyzmetkerlerin tolyqtaı, 100 paıyz baspanaly etýdiń retin keltirý sııaqty iri isteri onyń menedjerlik qasıetin de tanytty. «Egemen Qazaq­stannyń» toqsanjyldyq torqaly toıynda gazet ujymy men basylym ardagerlerin Elbasymyz Nursultan Nazarbaevtyń ózi kelip quttyqtaýy bas basylymnyń el ómirindegi ózgeshe ornynyń aı­shyqty aıǵaǵyna aınaldy. Keshe Ortalyq saılaý komıssııa­synda  Saýytbek Abdrahmanovqa Parlament Májilisi depýtatynyń kýáligi tapsyrylyp, halyq qalaý­lysynyń tósbelgisi taǵyldy. Biz bul jaıdy qaıratker qalam­gerdiń kezekti tabysy dep qana emes, bas basylymnyń bir bıigi, «Egemen Qazaqstannyń» el aldyn­daǵy bedeliniń aıǵaǵy dep te qaraımyz. Táýelsizdik jyldarynda áýelde gazet basqaryp, odan keıin Parlament depýtattyǵyna saılanǵan burynǵy bas redaktorlarymyz – Sherhan Murtaza men Ábish Kekilbaev salǵan joldyń jarasymdy jalǵasy dep bilemiz. Muny maqtanysh tutamyz. Gazet tarı­hynda izgi izin qaldyrǵan basshymyzdy jańa abyroıly ata­ǵymen quttyqtaı otyryp, úlkendi úlkendeı, kishini kishideı syılap, barshanyń qurmetine bólengen azamattyń depýtattyq qyzmetiniń de jemisti bolýyn tileımiz. Egemenqazaqstandyqtar.