Álem-jálem álem
Shotlandııadan aǵylshynnyń uly dramatýrgy Ýılıam Shekspırdiń 1623 jyly jaryq kórgen alǵashqy pesalar jınaǵynyń bir danasy tabyldy.
Oksford ýnıversıtetiniń mamandary jádiger ispettes folıantqa Bıýt aralynda kezdesken. Jınaqqa 36 pesa toptastyrylypty. Bulardyń teń jartysy, ıaǵnı 18-i buryn esh jerde jarııalanbaǵan týyndylar eken.
Gannıbaldyń qupııasyn kóne kóń ashyp berdi
Ǵalymdar ejelgi álemniń taǵy bir qupııasyn ashty. Olar Gannıbal men onyń armııasynyń Alpi asýynan ótken kezinde attardan qalǵan qıdyń quramyn zerttedi.
Oqymystylardyń halyqaralyq komandasy quramynda klostorıdıı elementi kóp qıdy Kol de la Traverset taýly asýynan tapqan. Olardaǵy birneshe myńdaǵan jyldar tiri jata beretin mıkrobtar bizdiń dáýirimizge deıingi 218-201 jyldarǵy ekinshi Pýnı soǵysynyń derekterine dáldik qosyp, Karfagen qolbasshysy jaýyngerleriniń asý boılap júrgen joldaryn týra syzyp shyǵýǵa múmkindik berdi.
Qytaı ımperatorynyń móri – $11,8 mıllıon
Sotheby’s aýksıonynda satylymǵa shyǵarylǵan Sın áýleti Kansı ımperatorynyń móri 11,8 mıllıon dollarǵa saýdalandy.
Ejelgi zamanǵy patshanyń mórin azııalyq bir kolleksıoner joǵarydaǵydaı baǵaǵa satyp aldy. Bul – osy kezge deıin aýksıonda satylǵan ımperatorlar mórleri ishindegi úshinshi kórsetkish. Mór sandal aǵashynan jasalǵan. Onyń betine: «Kókke tabynyp, adamǵa qyzmet et» degen jazý jazylypty. Al Kansı Qytaıdy 1661-1722 jyldar aralyǵynda 61 jyl basqaryp, bılik basyndaǵy ýaqyty jaǵynan rekord jasaǵan eken.
Karavadjonyń joǵalǵan kartınasy tabylǵan sııaqty
Aldyn ala boljam boıynsha, Fransııada ıtalıannyń ataqty sýretshisi Mıkelandjelo de Karavadjonyń buryn qoldy boldy dep eseptelip kelgen «Iýdıf pen Olofern» degen kartınasy tabylǵanǵa uqsaıdy.
Birqatar mamandar qazir jeke kolleksııadan kezdesken keskindeme týyndysyn belgili qylqalam sheberiniń ataqty kartınasy bolýy kerek, degen baılamǵa toqtalǵan. Biraq onyń qanshalyqty shyndyqqa janasatynyn ıtalıan mamany Djýzeppe Porsıo ǵana muqııat tekserip shyqqannan keıin anyqtap bere alady eken.
Tornadony túsirip júrip, áıelinen kóz jazdy
Amerıkanyń Illınoıs shtatynda bir er kisi quıǵytyp kele jatqan tornadony vıdeoǵa túsirip alypty. Sóıtip júrip, sol quıynnyń ıirimi óziniń áıelin jutyp ketkenin baıqamaı qalypty.
Sınoptıkterdiń eskertýlerine qulaq aspaǵan Klarens Shýls esimdi 85 jastaǵy qarııa oıǵa alǵanyn júzege asyrý úshin sol kúni óz úıiniń shatyryna shyǵyp ketken. Sonda otyryp, alapat qara daýyldy túsire beripti. Bir kezde úı jerge opyrylyp qulaǵan. Zaıyby sonyń astynda qazaǵa ushyraǵan. Qyzyqqumar shal kezdeısoq aman qalypty.
Nekege turar bolsań, tekserýden ót!
Túrikmenstanda osyndaı mızam kún tártibine endi. Budan bylaı úılengisi keletin árbir jas nekege otyrar aldynda densaýlyǵy jaǵdaıyn muqııat tekserýden ótkizip, óziniń áldeqandaı bir juqpaly aýrýmen aýyrmaıtynyn dáleldep shyǵýy tıis.
Atalǵan tártip elde «Adam ımmýnodefısıti vırýsyn (VICh-ınspeksııa) shaqyratyn aýrýdy taratýǵa qarsy kúres týraly» zań kúshine engennen keıin qolǵa alyndy. Ol shańyraq quryp, otaý tikkisi keletin jastardyń negizinen SPID atty naýqasqa qanshalyqty qatysy bar ekenin anyqtaıtyn bolady. Odan taza shyqqan talapkerlerge ǵana úılenýge ruqsat etiledi.
Aqparat agenttikteriniń materıaldary negizinde daıyndaldy.