Kaırde telefon baılanysy nasharlady
Keshe kóterilisten kóz ashpaı turǵan Egıpettiń astanasy – Kaır qalasynda telefon baılanysy nasharlady. Keıbir derekkózderine qaraǵanda, bul jaǵdaıdy úkimet ádeıi týyndatyp otyrǵan sekildi.
Degenmen, soǵan qaramastan, «Musylman aǵaıyndar» qozǵalysy jańa sherýge shyǵatyndaryn málimdeýde. Olar habar taratýda Facebook halyqaralyq áleýmettik baılanys júıesi men Twitter yqsham blogynyń qyzmetin paıdalandy. Keshe túnde birqatar egıpettik saıttardy ashý múmkindigi paıda bolǵanyna qaramastan, barlyq poshta serverleri jabyq bolyp shyqty.
Lıýksembýrg azamattyǵyn qabyldaýda
Belgııanyń ońtústiginde Lıýksembýrgpen shektesetin óńirlerde turyp jatqan júzdegen belgııalyq Lıýksembýrg azamattyǵyn qabyldaýda. Osyǵan qaraǵanda, olar óz elderiniń bolashaǵynan qaýiptenetin sekildi.
Qazirgi kúni Belgııada ekonomıkalyq jaǵdaıdyń nasharlap, osynyń negizinde saıası shıelenistiń kúsheıe túskendigi belgili. Eldiń kóptegen turǵyndary osyǵan baılanysty óz alańdaýshylyqtaryn ashyq bildirip otyr. Al Belgııa men Lıýksembýrgtiń ortasynda qos azamattyq týraly kelisim jasalǵan. Qazirgi kúni Belgııada HIH ǵasyrda osy elge kelgen lıýksembýrgtikterdiń urpaqtary kóptep turyp jatyr.
Kúıeý balasy da jazyqty bolǵany ma?
Týnıs úkimeti bılikten taıdyrylǵan prezıdent Zın ál-Ábıdın ben Álıdiń Kanadada turatyn kúıeý balasy Belhassan Trabelsıdi tutqyndaýdy osy eldiń úkimetinen talap etýde kórinedi.
Kanada úkimeti bul talapqa áli jaýap bere qoıǵan joq. Alaıda Kanadada turatyn Týnıstiń burynǵy prezıdentiniń týystaryna berilgen elde turý jónindegi ruqsattyń kúshin joıǵandyǵy málim boldy. Qańtardyń ortasynda elde paıda bolǵan jappaı narazylyqtyń yqpalymen memlekettik tóńkeristiń júzege asyp, prezıdent Zın ál-Ábıdın ben Álıdiń Saýd Arabııasyna qashqandyǵy belgili. Al munda áli úkimet jasaqtalmaı otyr.
Ekonomıka ósse, altyn quny tómendeıdi
Amerıka men Eýropadaǵy qarjy kórsetkishteriniń nyǵaıýyna baılanysty jáne AQSh ekonomıkasynda damýdyń baıqalýyna oraı osy aptada altyn baǵasynyń odan ári tómendeı túskendigi kórinis berdi. Birqatar sarapshylar ótken jyldyń qazany men jeltoqsany aralyǵynda AQSh ekonomıkasynyń ósimi 3,5 paıyzdy quraıdy dep málimdedi.
Daǵdarys kezinde altyn baǵasynyń edáýir óskendigi belgili. Máselen, 2010 jyly álemde onyń baǵasy 30 paıyzǵa kóterildi. Oǵan halyqtyń halyqaralyq valıýtalarǵa, sonyń ishinde, ásirese, dollarǵa degen seniminiń tómendegendigi áser etti. Osyǵan baılanysty adamdar altyn satyp alýdy kúsheıtti. Endi daǵdarystyń eńserilip, álemde ekonomıkanyń turaqtana bastaýyna baılanysty altyn baǵasy tómendep kele jatqan sııaqty.
Sońǵy kezde Microsoft tabysy orasan
2010 jyldyń qazany men jeltoqsany aralyǵynda Microsoft korporasııasy 19,95 mıllıard dollardyń kirisin kirgizgen. Sonyń ishinde kompanııa 6,6 mıllıard dollardyń taza paıdasyn qaratqan. Al jyl ishindegi onyń tabysy burynǵy kezeńmen salystyrǵanda, 5 paıyzǵa kóterilip otyr eken.
Keıbir sarapshylardyń málimdeýi boıynsha, Microsoft korporasııasy rynoktaǵy negizgi básekelesteriniń biri bolyp tabylatyn Apple-ge qaraǵanda, jaqsy jumys istegen. Taza paıda qaratý jaǵynan odan 600 mıllıon dollarǵa asyp túsken. Al 2010 jyldyń shildesi men qyrkúıegi aralyǵynda Microsoft 16,2 mıllıard dollardyń kirisin alyp, óz tarıhynda rekordtyq kórsetkishke qol jetkizgen kórinedi.
Davos forýmyna qatysýshylar qaýpi
Davos qalasynda ótip jatqan búkilálemdik ekonomıkalyq forýmǵa qatysýshylar álemdik ekonomıkany daǵdarystyń ekinshi tolqyny sharpıdy degen qaýipterin bildirýde. Olar bul jaǵdaıdy Qytaı ekonomıkasyndaǵy qarjynyń úlken bóligi qor naryqtaryna aýyp, bankterdiń kásiporyndarǵa beriletin nesıeni azaıta túskendigimen baılanystyryp otyr.
Qazirgi kúni daǵdarys kezinde óz turaqtylyǵyn saqtaı alǵan Qytaı ekonomıkasyna halyqaralyq ınvestorlar qarjyny kóptep quıa bastady. Osyny paıdalanǵan qor rynogynyń oıynshylary atalǵan jaǵdaıdan mol paıda taýyp qalýǵa umtylys tanytyp otyr. Ol, túptep kelgende, jańa qarjy daǵdarysyn týyndatýy múmkin eken. Alaıda Davosqa kelgen Qytaı halyq bankiniń ókili Lı Daokýı búkilálemdik forýmǵa qatysýshylardy Qytaı basshylyǵynyń mundaı jaǵdaıǵa jol bermeıtindigine sendirip baǵýda.
Qysqa qaıyryp aıtqanda:
*Koreıa Halyqtyq-Demokratııalyq Respýblıkasy basshysynyń Makao qalasynda (Qytaı) turatyn úlken uly Kım Chen Nam japonnyń «Tokıo sımbýn» gazetine bergen suhbatynda Soltústik Koreıa men AQSh arasyndaǵy kıkiljiń báseńsimese, Soltústik Koreıanyń ıadrolyq qarýdan esh ýaqytta bas tartpaıtyndyǵyn málimdegen.
*AQSh ákimshiliginiń resmı ókili Robert Gıbbs Egıpet prezıdenti Hosnı Múbáraktyń AQSh-tyń senimdi áriptesi sanalatyndyǵyna qaramastan, Vashıngtonnyń Egıpette bolyp jatqan úkimetke qarsy sherýlerge qatysty eshbir áreket jasamaıtyndyǵyn atap kórsetken.
Internet materıaldary negizinde ázirlendi.
