Qurylysy byltyr bastalǵan zamanaýı kópfýnksıonaldy keshenge 4,9 mlrd teńge jumsalypty. Bas merdiger «Alem Qurylys AQ» JShS jylǵa jetpeıtin ýaqytta ekologııalyq mádenıetti qalyptastyratyn nysandy salyp bitirdi.
Ashylý rásiminde oblys ákimi Murat Ergeshbaev balalardy merekemen quttyqtap, Botanıkalyq baq jumysy jetkinshekterdiń tıimdi demalysyn uıymdastyrýǵa jáne tyń jobalardy júzege asyrýǵa baǵyttalǵanyn atap ótti.
«Prezıdent saıabaǵynyń aýmaǵynan ashylǵan Botanıkalyq baq – osy aýqymdy bastamanyń aımaǵymyzdaǵy naqty ári jemisti kórinisi. Baq ishine Qytaı, Ońtústik Afrıka, Japonııa, Ońtústik jáne Ortalyq Amerıkada ósetin jasyl jelek egildi. Osy arqyly jas jetkinshekter ósimdikterdiń ekojúıedegi mańyzy týraly aqparat alady. Kópfýnksıonaldy keshende balalarymyz tabıǵatpen tildesip, eńbektiń baǵasyn bilip, ekologııalyq jaýapkershiliktiń salmaǵyn sezine túsedi. Osy baqtan el ekologııasyn zertteıtin bolashaq ǵalymdar, bıologter men agronomdar shyǵaryna senemiz», dedi oblys basshysy.
Baqta veerli palma, Kanar qurmasy, kaktýs pen aloe, vashıngtonııa palmasy, strelısııa, jakaranda, alyp ıýkka, maqta aǵashy, bambýk, sándik ósimdikter, karıota jaıqalyp tur. Baq mıkroklımatty avtomatty basqarý, sýarý jáne sý daıyndaýdyń zamanaýı ınjenerlik júıelerimen jabdyqtalǵan. Erekshe atmosferasy kelýshilerge jaılylyq syılaıtyn nysanda stýdentterdiń, mektep oqýshylarynyń, tabıǵat janashyrlarynyń tanymyn keńeıtýge barlyq jaǵdaı jasalǵany baıqalady. Jalpy, Syr óńirinde keıingi tórt jylda 46 zamanaýı bilim nysany tabystaldy. «Keleshek mektepteri» ulttyq jobasy aıasynda 10 jańa mektep salynyp, fızıka-matematıka baǵytyndaǵy «Bilim-ınnovasııa» lıseı-ınternaty, mýzykalyq kolledjdiń jańa oqý ǵımaraty men jataqhanasy paıdalanýǵa berildi. «Oqýshylar saraıy», «Syr juldyzdary» akademııasy, Jalaǵash, Jańaqorǵan, Shıeli aýdandaryndaǵy Oqýshylar úıi men О́ner mektepteri jas jetkinshekterdiń shyǵarmashylyq, zııatkerlik áleýetin arttyrýǵa qyzmet etip jatyr.
Jaqynda ǵana osy nysandar qatary tolyǵyp, jyl boıy úzdiksiz qyzmet kórsetetin «AI-KERIM» oqý-saýyqtyrý ortalyǵy balalar ıgiligine aınaldy.
QYZYLORDA
