Biz qanshamyz, qandaımyz?

Qazaqstan halqy 2030 jylǵa qaraı 20 mıllıonǵa jetedi. Bul týraly Astana ekonomıkalyq forýmy aıa­syndaǵy ósýdiń ja­ńa úl­gisin izdeý jolynda taqyry­byndaǵy sessııada Densaýlyq saqtaý jáne áleýmettik damý vıse-mınıstri Birjan Nurym­betov málimdedi. – Demografııalyq boljamdar boıynsha, eńbekke qabiletti jastaǵy Qazaqstan halqynyń jyl saıynǵy tabıǵı ósimi 2017-2018 jyldary 10 myń adamǵa deıin tómendeıdi. Al 2019 jyldan bastap ósim joǵarylaı bastaıdy. Sonymen qatar, 2020 jyly ósim shamamen 25 myń adamǵa jetedi. Al 2025 jylǵa qaraı jyl saıynǵy ósim 100 myń adamnan asady. Bul eńbek naryǵynda kúrdeli jaǵdaı týyndatqanymen, ekonomıkalyq ósim qarqynyna oń  yqpal etetin bolady, – dedi vıse-mınıstr. Onyń aıtýynsha, aldaǵy ýaqytta tabıǵı ósim men adam­dardyń ómir súrý uzaq­ty­ǵynyń artýy sebepti Qazaq­stan halqynyń jalpy sany da kóbeıetin bolady. Jıyn barysynda ol Birikken Ulttar Uıy­my ekonomıkalyq jáne áleýmettik ister depar­tamentiniń boljamdy máli­met­terin tilge tıek etti. Málimet­terge júginer bolsaq, 2030 jy­ly Qazaq­stan halqy 14 paıyzǵa ósip, 20,1 mıllıon adamǵa j­ete­tin bolady. – Ýaqyttyń osynaý syn-qaterine jaýap berý úshin biz ishki eńbek resýrstaryn ónimdi jumysqa tartýdy josparlaýdamyz. Qazirgi tańda «Jumyspen qamtýdyń jol kartasy-2020 baǵdarlamasyn júzege asyryp jatyrmyz», – dedi ol. Aıta keteıik, Ulttyq ekonomıka mınıstrligi Statıs­tıka komıtetiniń habarlaýynsha, Qazaqstan halqynyń sany mamyr aıynyń basynda 17 mıllıon 733,1 myńǵa jetken. Aıan ÁBDÝÁLI, «Egemen Qazaqstan»