Jalǵan dıplom jarǵa jyqpasyn...

Ońtústik Qazaqstan oblysynyń ortalyǵy – Shymkent qalasynan sol­tús­tikke qaraı 45 shaqyrym jerde Qarabulaq degen aýyl bar. Halqynyń sany 45 myń adamdy quraıtyn osy eldi mekende №81 Ulyqbek atyndaǵy mektep dırektory H.Haltaevtyń jalǵan dıplomy týraly aqparattyń taraǵanyna biraz ýaqyt ótti. Umytyla bastaǵan bul jaıdy jaqynda redak­sııamyzǵa atalǵan aýyl turǵyny M.El­taevadan kelip túsken hat qaıta jań­ǵyrtty.  Buǵan deıingi aýyl turǵyny tarapynan jazylǵan hatta naqty dáıekter keltirilmegendikten, biz ony qaraýdan bas tartqanbyz. Alaıda, ekinshi hatynda óz sózine aıǵaq bolatyndaı qujattarymen qosa jiberipti. Onyń jazýyna qara­ǵanda, №81 Ulyqbek atyndaǵy mek­tep dırektory H.Haltaev О́zbek­stan memlekettik álem tilderi ýnı­ver­sıtetin bitirmegen. Olaı bolsa, qolyndaǵy dıp­lomy da jaramsyz. M.Eltaeva bul másele boıynsha Saıram aýdandyq bilim bóliminiń meń­gerýshisi O.Qoldasovaǵa júgin­genmen, sheneýnik tarapynan áli kúnge jaýap berilmegen. Esesine Saı­ram aýdany ákiminiń orynbasa­ry T.Kerimbekov О́zbekstan Jo­ǵa­ry jáne orta kásiptik bilim mınıstr­liginiń 29.02.2016 jylǵy №16l/4673 hatyna silteme jasaı otyryp, Haltaev Hamraqul Abdýlhamıdovıch О́zbekstan memlekettik álem tilderi ýnıversıteti rektorynyń 04.07.1994 jylǵy №67-3 buıryǵymen №260703 dıplomy berilgendigin qýat­taǵan. Ákimniń orynbasary bul rette O.Qoldasovadan alynǵan túsinik­temede shaǵymdanýshy M.Eltae­vadan eshqandaı da aryz túspe­gendigin jetkizgen. Al ózbekstan­dyq bilim ordasynyń oqý isi boı­yn­sha prorektory H.Hakımov­tiń 26.06.2015 jylǵy №03/1077 jaýa­byna qaraǵanda, 2015 jyldyń 12 maý­symynda shyǵarylǵan №257 «Ýnı­versıtettiń stýdenttik bólimin­de qujattardy túgendeý týraly» buıryǵyna oraı jumys júrgi­zilgen. Sonda anyqtalǵany Ham­raqul Haltaev Respýblıkalyq pedago­gıkalyq ınstıtýttyń syrttaı oqytý boıynsha ulttyq mektepterdegi orys tili men ádebıeti fakýltetinde 645 stýdenttiń arasynan tabylmady. Myna jaıtqa nazar aýdartqandy jón kórip otyrmyz. Atalǵan oqý or­da­synyń muraǵatynda ondaı stý­denttiń oqymaǵandyǵy aıqyn bolǵany­men, kadrlar bóliminde saqtal­ǵan 4 shilde 1994 jylǵy №67/z buıryǵynyń taǵy bir túp­nusqa­synda 646 stýdenttiń arasyna Hamraqul Abdýlhamıdovıch Hal­taevtyń aty-jóni belgisiz bireý­ler tarapynan engizilipti. Son­dyqtan da jumys toby jalǵan máli­metter negizinde Hamraqul Abdýl­hamıdovıch Haltaevtyń atyna beril­gen №260703 dıplomdy jaramsyz dep tapqan. Onyń ústine, OQO ad­vokattar alqasynyń jeke advokaty T.Joldasovanyń suranymyna oraı jaýapta О́zbekstan memlekettik álem tilderi ýnıversıteti muraǵat bóliminiń meńgerýshisi Ý.Isaeva 1994 jylǵy ulttyq mektepterde orys tili men ádebıeti fakýltetin syrttaı bitirgenderdiń tiziminde Hamraqul Abdýlhamıdovıch Haltaevtyń aty-jóni joqtyǵyn habarlaǵan. Oqyrmanǵa túsinikti bolý úshin О́zbekstan prezıdentiniń jar­lyǵymen Respýblıkalyq peda­gogı­kalyq ınstıtýty men F.Engels atyndaǵy Tashkent memlekettik shet tilderi pedagogıkalyq ınstıtýty biriktirilip, О́zbekstan mem­le­kettik álem tilderi ýnıversıteti bolyp qurylǵanyn aıta ketý kerek. Taǵy bir máselege nazar aýdar­­ta ketken jón. О́zbekstan Joǵa­­ry jáne orta kásiptik bilim mınıstr­ligi Quqyq bóliminiń basshysy I.A.Abdýllaev OQO advokattar al­qasynyń jeke advokaty T.Nur­ja­novqa bergen jaýabynda atalǵan bilim ordasy rektorynyń buıryǵyna silteme jasaı otyryp, Hamraqul Abdýlhamıdovıch Haltaevqa ulttyq mektepterde orys tili men ádebıetiniń bilikti muǵalimi mamandyǵy berilgendigin jazypty. Al «Bahtııor Kalkon» advokattyq fırmasynyń suranymyna oraı bergen jaýapta ondaı bólimniń joq ekendigi aıtylady. Joǵary jáne orta kásiptik bilim vıse-mınıstri M.Inoıatov óziniń 2016 jylǵy 25 sáýir kúngi №284 jaýa­bynda atalǵan vedomstvoda ondaı quqyqtyq bólimniń joq ekenin jáne I.A.Abdýllaev degen qyzmet­kerdiń jumys istemeıtindigin, sondaı-aq, 29.02.2016 jylǵy №26k/4673 haty­nyń jalǵan ekendigin alǵa tartady. Osyndaı dáleldi aıǵaqtardy alǵa tosqan M.Eltaevanyń hatyna oraı biz mán-jaıdy bilmekke Ońtústik Qazaqstan oblystyq bilim basqarmasy baspasóz qyzmetiniń qyzmetkeri A.Ámirtaevqa habar­lastyq. Mundaı aqparatty birinshi ret estip turǵandyǵyn aıtqan Azat Ermekbaıuly jergilikti bilim bóliminiń basshysyn aýdan ákimi, al bilim bóliminiń basshysy mektep dırektoryn taǵaıyndaıtyndyǵyn kóldeneń tartyp, saýatymyzdy bir ashyp tastady. Sondyqtan barlyq jaýapkershilik solarda, deı kelip: «Biz sizge ne kómek bere alamyz?», degen saýalyn da umytqan joq. Sizderge kómek ber dep jatqan joqpyz, men tek osyndaı másele bar dep aıtpaqshymyn degennen keıin ǵana: «Men surastyryp kóreıin. Aýdanǵa habarlasaıyn. Ha­barsyzbyn», dep jaýap qatty. Bilim salasynda júrip, buqa­ra­lyq aqparat quraldarynda óz salasy boıynsha jazylǵan jaıttarǵa nazar aýdarmaǵan mamandy qalaı túsinýge bolady? Onyń ústine bul másele keshe nemese búgin qoz­ǵalyp otyrǵan joq. Sondyqtan da biz osy másele boıynsha Saıram aýda­nynyń ákimi S.Saparbaevpen habar­las­qanymyzda, ol óziniń qyzmetine kiriskenine kóp bola qoımaǵanyn alǵa tartty. «Bul másele ábden tekse­rilgen, anyqtalǵan, jaýaby daıyn. Bilim bóliminiń basshysynan suradym, ondaı faktiler anyq­talyp, tıisti organdardan jaýabyn alǵanbyz dep otyr. Qajet bolsa, jaýabyn joldaıyq, biraq obektıvti qaraý kerek. Bir aryzqoı jazdy eken dep, bárin qaralaýǵa bolmaıdy ǵoı. Tıisti quzyrly mekemeler suraý jasatyp, anyqtap qoıǵan. Organdar durys anyqtamasa, jaýap beredi», dedi Samat Aıdarhanuly. Sondaı-aq, aýdandyq proký­ror­dyń kómekshisi Sýhrab Qaharovqa telefon shalǵanymyzda, ol resmı túrde basshylarmen sóılesýim kerektigin eskertti. «Ekinshiden, bul másele boıynsha qylmystyq is qozǵalyp otyr. Soǵan sáıkes beril­gen suraý hat Syrtqy ister mınıstr­ligi arqyly О́zbekstanǵa joldanǵan. Búgingi tańda jaýaby áli kelgen joq. Saıram aýdandyq ishki ister basqarmasy tarapynan tergeý isteri júrgizildi. Ishki ister basqarmasynan bilgenińiz durys», dedi prokýror. Ishki ister basqarmasynyń is-áre­ket­teri prokýratýra nazarynda bolaty­nyn qaperge alyp, ázirge osy jerden toqtadyq. Qoryta aıtqanda, biz OQO Saıram aýdany Qarabulaq aýylyndaǵy №81 Ulyqbek atyndaǵy mektep dırektory H.Haltaevtyń dıplomynyń jalǵan ekenin áshkereleýdi basty maqsat etken joqpyz. Maqalany jazýdaǵy negizgi maqsatymyz – bilim berý mekemesin óz isiniń mamany, bilikti pedagog basqarsa degen nıet. Sondyqtan da joǵaryda qujattyq dálelderdi keltirdik. Olaı bolsa, biz qarsy jaqtyń da ýájin tyńdaýǵa ázirmiz jáne bul máselege túpkilikti núkte qoıǵandy jón sanaımyz. Asqar TURAPBAIULY, «Egemen Qazaqstan»