Armııa oıyndarynyń daıyndyǵyn tekserdi

Keshe elimizdiń Qorǵanys mınıstri Imanǵalı Tasmaǵambetov «Gvardeısk» polıgonyna bardy. Onda birneshe kúnnen keıin Armııa halyqaralyq oıyndary-2016 aıasynda úzdik mergender men artıllerııashylardyń halyqaralyq baıqaýlary bastalady. «Artıllerııalyq oq atý sheberleri» men «Mergender shebi» baıqaýlaryn bastaýǵa polıgonda barlyq qajetti ınfra­qurylym daıyndalǵan jáne qoıylǵan. Artıllerııashylar  baıqaýyn ótkizý úshin arnaıy alań, mınajarylǵysh qorshaýy, tóm­peshikter, kópiri jáne kedergileri bar uzyndyǵy 2 shaqyrymdyq tas jol, mergenderdiń baıqaýy kezinde  vıntovkadan, tapanshadan oq atý jáne granatalar laqtyrýǵa arnalǵan barlaýshynyń soqpaq joly men shepteri salyndy. Qorǵanys mınıstri áskerı teh­nıkany saqtaý jáne qyzmet kórsetý oryndary boıynsha al­dyńǵy kóshpeli keńeste bergen tap­syrmalardyń oryndalý barysyn tekserdi. Sondaı-aq, komandalardyń jatyn jaıy men tamaqtaný oryndaryn taǵy bir márte qarap shyqty. «Eń ma­ńyzdysy, uıymdastyrý jónin­degi jaýapty adamdar baqylaý má­se­­le­si­niń mańyzdylyǵyn da uǵy­ný­­­­lary tıis. Sondyqtan, jumysty bar­lyq ko­mandalardyń qaýip­siz­­dik sharalaryn múltiksiz saqtaıtyndaı etip uıymdastyrýlaryńyz abzal», – dep atap ótti Imanǵalı Tasmaǵambetov. Sapar barysynda qorǵanys vedomstvosynyń basshysy jaqyn­da ǵana oqý-jattyǵý barysynda tótenshe jaǵdaı saldarynan zardap shekken angolalyq komanda  músheleriniń hal-jaǵdaıyn surastyrdy. Gos­pıtalda olarǵa barlyq qajetti bilikti medısı­nalyq kómek kórsetildi. Qazirgi kezde zardap shekkenderdiń jaǵ­daıy qanaǵat­tanarlyq. Armııa halyqaralyq oıyndary-2016 Qazaqstanda 2 tamyz kúni bastalatynyn esterińizge sala keteıik. Bizdiń elimiz bıyl alǵash ret óz aýmaǵynda álemniń ártúrli elderi armııasynyń úzdik ókilderinen quralǵan komandalardy qabyldaıdy. «Gvardeısk» polıgony bir aptaǵa mergender men artıllerııashylardyń iri halyqaralyq jarysy alańyna aınalmaq. 13 eldiń – Qazaqstan, Angola, Armenııa, Belarýs, Venesýela,  Zımbabve, Úndistan, Iran, Qyr­ǵyz­stan, Qytaı, Mońǵolııa, Reseı jáne OAR-dyń áskerı qyz­met­shilerinen quralǵan komandalar eń kásipqoı, myqty, mergen jáne tózimdiler ataǵy úshin kúsh synasady. Osy jyly halyqaralyq armııa oıyndary 23 atalym boıynsha ótedi. Reseılik komanda barlyq nomınasııaǵa qatysady. Qytaı tarapy – 22, al Qazaqstan 21 nomınasııada básekege túsedi. «Egemen-aqparat»