Bıznes ıdeıalar qarjylandyrylady

Elimizde jastardyń kásip ashýyna, ózindik ıdeıalaryn júzege asyrýyna jańa múmkindik paıda boldy. Ol byltyrǵy jyldan beri uıymdastyrylyp kele jatqan – «Startup Bolashak» jobasy. Atalǵan baıqaýǵa Qazaqstannyń 18-29 jas aralyǵyndaǵy jas býyn ókilderi, sonymen birge, jobalyq toptar qatysa alady. Osyǵan oraı Ortalyq kommýnıkasııalar qyzmetiniń baspasóz ortalyǵynda jobanyń bıylǵy jospary talqylanyp, talap-erejeleri túsindirildi. – «Startup Bolashak» bıznes baıqaýynyń ekinshi maýsymyndaǵy júlde qory 30 mıllıon teńgeni qurap otyr. Baıqaýǵa qatysý úshin ótinishter 2016 jyldyń 23 qyrkúıegine deıin «Damý» qorynyń barlyq óńirlerde ashylǵan kásipker­lerge qyzmet kórsetý ortalyq­tarynda qabyldanady. Joba 8 baǵytty qamtıdy. Olar – bıznes ortasyn jaqsartý, qorshaǵan ortany qorǵaý, bilim berý, densaýlyq saq­taý, qaıyrymdylyq, dene shynyq­tyrý men sportty damytý, mádenı jáne patrıottyq is-sharalar. Qatysý­shylarǵa qoıylatyn negizgi talap – tyń, ári «Qazaqstanda jasalǵan» degen ıdeıany qalyptastyrý», – dedi, «Bolashaq» qaýymdastyǵy keńesiniń múshesi, «Damý» qorynyń basqarma tóraǵasy Qýanysh Tileýshın. «Aıta keteıik, ótken jyly «Startup Bolashak» baı­qaýy­nyń birinshi maýsymy qory­tyn­dylanyp, jeńimpazdar kólemdi qarjyǵa ıe bolyp, óz isterin bas­tap ketken bolatyn. Olardyń qataryndaǵy 1-oryndy jeńip alyp, 10 mln. teń­geni qanjy­ǵaǵa baılaǵan Ádilet Eleýsov «Neıtron» ǵylymı-saýyq zerthanasyn ashsa, ekinshi oryndy enshilegen Eldos Baıalyshbaev 8 mln. teńgege ıe bolyp, dertke shıpa Alakólde muqtaj jandarǵa arnalǵan «Asar» pansıonatyn ashqan bolatyn. Al 3-oryn alyp, 5 mln. teńgeni enshilegen Baqtygúl Qasymova «Alaý» shyny buıymdaryn óńdeý jáne óndirý sheberhanasyn qolǵa alǵan. Osy jobalardyń maqsaty jas býynnyń zııatkerlik áleýetin arttyrý, ıdeıalaryn halyq arasynda nasıhattaýdy júzege asyrý», – dedi ol. Jeńimpazdardyń esimderi qara­sha­nyń 26-sy kúni ótetin bız­nes-jos­par­lar marafonynda belgi­li bolady. Aıman MUQYShEVA