Elektrondy astyq qolhatynyń tıimdi tustary

Bıylǵy jyly 23 shildeden bastap astyq qolhattary elektrondy túrge ótken bolatyn. «Qazaqstannyń fermerler odaǵy» respýblıkalyq qoǵamdyq birlestiginiń tóraǵasy Áýezhan Darınovtyń aıtýynsha, jańa tártip astyq ósirýshilerdiń jumysyn anaǵurlym jeńildetedi jáne tabysyn molaıtýǵa da yqpal etedi. Bul týraly ol keshe Prezıdent janyndaǵy Ortalyq kommýnıkasııalar qyzmetinde ótken brıfıngte baıandady.   Áýezhan Darynov jańa júıeniń artyqshylyqtaryn bizge tómendegishe túsindirip berdi. – Buryn fermerler ákel­gen astyqtarynyń qol­hatyn alý úshin elevatorǵa baryp, sol jerde tapjylmaı kútip otyratyn. Astyq túsirgen árbir kólikti eseptep, kún saıyn elevatorǵa barýǵa máj­­búr bolatyn. Qazirgi elek­­­trondy astyq qolhatyn úıde otyryp-aq alýǵa bolady. Ol úshin keregi ınternet pen kompıýter, smartfon da jaraıdy. Bul – birinshiden. Ekinshiden, jumys barynsha ashyq júrgiziledi. Buryn astyq qolhatyn qyrkúıekten bas­tap ótkizetinbiz. Sosyn, ony satý úshin qarasha, jel­toqsan aıyna deıin kú­tetinbiz. Qazir qansha as­tyq tapsyrdyq, ol qalaı saqtalyp jatyr degen syndy kerek málimettiń bárin úsh kún saıyn bilip otyramyz. Iаǵnı, elektrondy astyq qolhatynyń arqasynda astyq ósirýshilerdiń qanshalyqty eńbek etse, sonshalyqty zeı­netin kórýge degen múmkindigi arta túsken. Taǵy bir aıta keterligi, astyq qolhattarynyń «qundy qaǵaz» degen mártebesi bar, ol astyq ıesi qanshalyqty astyq tapsyrsa, sonsha múlik­tik quqyǵyn rastaıdy. Al ol fermerler bankten nesıe alǵysy kelgen jaǵdaıda kepildik retinde qoldanýǵa da jaramdy. Arnur ASQAROV, «Egemen Qazaqstan»