Elbasy olımpıadashylardy marapattady

Búgin Astanada Olımpııalyq oıyndardyń chempıondary men júldegerlerin marapattaý rásimi ótti. Saltanatty sharada Memleket basshysy Nursultan Nazarbaev Olımpıada chempıondaryn II dárejeli «Barys» ordenimen marapattady. Bul nagradany boksshy Danııar Eleýsinov, júzgish Dmıtrıı Balandın men Nıjat Raxımov aldy. Sonymen birge Elbasy osy ordendi bokstan Olımpıadanyń kúmis júldesin alǵan Vasılıı Levıt pen Ádilbek Nııazymbetovke tapsyrdy. Nursultan Nazarbaev olardyń kúmis medali altyn júldemen para-par ekenin, sondyqtan kúmis júlde Olımpıada chempıony ataǵymen teńestiriletinin aıtty. «Olımpıadada boksshylar Vasılıı Levıt pen Ádilbek Nııazymbetov laıyqty óner kórsetti. Sol sebepti olardyń júldeleri altyn medaldiń syıaqysymen teńestiriledi», dedi ol. Kezdesýde Elbasy kúmis júldegerler Jazıra Japparqul (aýyr atletıka), Eldos Smetov (dzıýdo), Gúzel Manıýrova (áıelder kúresi) men bokstan qola júldeni ıelengen Ivan Dychkoǵa «Parasat» ordenin tabys etti. Sonymen birge Memleket basshysy «Qurmet» ordenimen qola júldegerler - dzıýdoshy Galbadrax Otgonseseg, ziltemirshiler  Karına Gorıcheva, Aleksandr Zaıchıkov pen Farxat Harkı, erkin kúres sheberleri Ekaterına Larıonova men Elmıra Syzdyqovany jáne boksshy Darıǵa Shákimovany marapattady. Saltanatty sharada Memleket basshysy sportshylarymyzdyń 270 eldiń arasynda 22-shi oryndy ıelenip, barsha álemniń aldynda elimizdiń abyroıyn asqaqtatqanyn aıtty. «Bıylǵy Olımpıadada elimizdiń ánurany úsh ret shyrqalyp, kók baıraǵymyz úsh márte kóterildi. Bokstan ulttyq quramanyń kapıtany Danııar Eleýsinov jeńis tuǵyrynan kórindi. Al elimizdiń tarıhymyzda alǵash ret júzgish Dmıtrıı Balandın altyn medaldi ıelendi. Mundaı tabys elimizde buryn-sońdy bolǵan joq. Meniń oıymsha, endi júzýge qyzyǵýshylyq tanytqan balalar  kóbeıip, Olımpıada chempıondarynyń sany artady. Olımpıadada aýyr atlet Nıjat Rahımovtyń eńbegi laıyqty baǵalandy», dedi ol. Osydan keıin Elbasy Olımpıadanyń kúmis júldegerleri Ádilbek Nııazymbetov pen Vasılıı Levıttiń eńbegin aıta kelip, olardyń jahandyq jarysta kórsetken ónerine rızashylyǵyn bildirdi. «Biz eki boksshymyzdyń medaldaryn Olımpıadanyń altyn júldesi dep sanaýymyz kerek. Osyǵan baılanysty olardyń júldesin yntalandyrý turǵysyn alǵanda altyn medalmen  teńestirdim», dedi Prezıdent. Sol sııaqty ol jeńil atlet Olga Rypakovanyń qola medaline altyn júlde retinde baǵalaıtynyn atap ótti. «Olga Rypakova Olımpıadaǵa jaqsy daıyndaldy. Ol Londonda jáne Rıo-de-Janeıroda ótken Olımpıadalardyń arasynda shekesi torsyqtaı ul tapty. Qazir balasy 3 jasta. Birinshiden ol ana, ekinshiden naǵyz batyr áıel. Eki úlken dodanyń arasynda jarystarǵa qatysyp, bıik belesterden kórinip júrdi. Bul sportshynyń óz kásibine adaldyǵyn, óz eline degen qyzmetin kórsetedi», dedi. Elbasy elimiz sporttyń basqa túrlerinen kúmis jáne qola medal alǵan otandastarymyzdyń eńbegin  baǵalaıtynyn, bolashaqta budan da bıik belesterdi baǵyndyrýlaryna tilektestigin jetkizdi. Kezdesýde Nursultan Nazarbaev Olımpıada chempıondary men júldegerlerine ózderi týyp-ósken jerlerinde de syı-qurmettiń kórsetiletinin, degenmen osy ataq, qurmetke masattanbaı, beldikterin býyp, aldaǵy jarystarǵa daıyndalyp júrý kerektigin aıtty. Marapattaý rásiminde Olımpıada chempıondary men júldegerlerin  Elbasynyń elimizde sportty damytýda júrgizilip jatqan saıasatyna, jankúıerlerdiń qoldaýyna  rızashylyǵyn bildirdi. Bıylǵy Olımpıadaǵa Qazaqstan osymen 6 ret qatysyp, jazǵy jáne qysqy Olımpııalyq oınydardy eseptegende eń kóp júldege ıe boldy. Barlyǵy 17 medal utyp aldy. Sonyń ishinde 3 altyn, 5 kúmis jáne 9 qola júlde bar. Dastan KENJALIN Foto: Erlan OMAROV