Qupııa qujattar kórmege qoıyldy

Keshe Syrtqy ister mınıstrliginde Qazaqstan Respýblıkasy Prezıdenti Muraǵatynan alynǵan qujattar negizindegi kórmeniń ashylý rásimi ótti. Onda Elbasynyń jahandyq jáne aımaqtyq qaýipsizdikti nyǵaıtýdaǵy bastamalary kórinis tapqan.   Saltanatty rásimde sóz alǵan Syrtqy ister mınıstriniń orynbasary Roman Vasılenko Qazaqstan táýelsizdik alǵan alǵashqy jyldardan beri ıadrolyq qarýdan bas tartý ıdeıasyn batyl ustanyp kele jatqan el ekenin atap kórsetti. Al Qazaqstan Respýblıkasy Prezıdenti Muraǵaty dırektorynyń orynbasary Qaırat Álimǵazınov: «KSRO ydyrap jatqan tusta jaýapkershilikti óz moınyna ala turyp, 1991 jyly 29 tamyzda Semeı ıadrolyq synaq polıgonyn jabý týraly Jarlyqqa qol qoıǵan edi. Osy taǵdyrsheshti Jarlyq arqyly Prezıdent N.Nazarbaev ıadrolyq derjavalar basshylaryna taǵylym kórsetip, qarýsyz álemniń Kóshbasshysyna aınaldy», deı kele, Prezıdent Muraǵatynda «óte qupııa» tańbasymen saqtalǵan, kezinde jurtshylyqqa belgili bolmaǵan qujattar kórme aıasynda jurtshylyq nazaryna usynylyp otyrǵanyn jetkizdi. «Máselen, 60-shy jyldary jumys istegen dárigerlerdiń arnaıy komıssııasynyń qorytyndylary bar. 1987-1988 jyldardyń ózinde 32 synaq ótkizildi. Sonyń saldarynan, árbir úshinshi jarylysta  jer betine 20-dan 150 kılotonnaǵa deıin  radıoaktıvti gazdar taralyp ketken. Mine, osyndaı derekter kórsetilgen qujattardy da osy kórmeden tabýǵa bolady. Jalpy, Prezıdent Muraǵatynyń qujattarymen tanysý Elbasy N.Nazarbaevtyń jappaı ıadrolyq qarýsyzdaný úderisine, jer betinde beıbitshilik ornatý isine qosqan úlesine qatysty kóp málimet alýǵa múmkindik beredi dep oılaımyz», dedi Muraǵat dırektorynyń orynbasary. Avstrııa men Slovenııadaǵy elshi, Qazaq­stannyń Vena qalasyndaǵy Halyqaralyq uıymdar janyndaǵy turaqty ókili Qaırat Sarybaı men  elimizdiń Energetıka mınıstrli­gine qarasty Atomdyq jáne energetıkalyq qadaǵalaý men baqylaý komıteti tóraǵasynyń orynbasary Tımýr Jantıkın jýrnalısterge arnap brıfıng ótkizdi. Qaırat Sarybaı Qazaqstan Prezıdentiniń halyqaralyq beıbitshilik pen qaýipsizdikti nyǵaıtýǵa, barsha adamzattyń ıgiligi úshin ekonomıkalyq jáne áleýmettik damýǵa baǵyttalǵan belsendi syrtqy saıasatyna toqtalyp ótti. «Osyndaı saıasattyń arqasynda bizdiń elimiz laıyqty qurmetke ıe bolyp otyrǵany barshamyzǵa aıan. Elimiz Táýelsizdik alǵan 25 jyl ishinde Memleket basshysy kóptegen halyqaralyq bastama kóterip, ony júzege asyrdy. Máselen, Azııadaǵy ózara is-qımyl jáne senim sharalary jónindegi  keńes búginde bedeldi únqatysý alańyna aınaldy. Álemdik jáne dástúrli dinder lıderleri seziniń ótýine uıytqy boldy. Osynyń ózi qyrýar sharýa. Elbasy BUU Bas Assambleıasynyń 70-shi sessııasynyń minberinen usynǵan «Álem. XXI ǵasyr» manıfesinde jalǵasyn tapqan jańa bastamalary  dúnıe júzinde, ásirese, men qyzmet atqaryp júrgen Vena qalasyndaǵy halyqaralyq uıymdarda úlken rezonans týǵyzdy», dedi Q. Sarybaı. Osylaı deı kele, ol Vena qalasyndaǵy Halyqaralyq uıymdar janyndaǵy turaqty ókildiktiń, elshiliktiń Elbasynyń halyqaralyq bastamalaryn júzege asyrý boıynsha atqaryp jatqan jumystaryna toqtaldy. «Jalpy, elimizdiń ıadrolyq qarýsyzdaný jáne jappaı qyryp-joıý qarýlaryn taratpaý tártibin nyǵaıtý salasyndaǵy kúsh-jigeri álemdik qoldaýǵa ıe bolyp, keńinen moıyndaldy», dedi Q. Sarybaı. Brıfıng barysynda Energetıka mınıstr­ligine qarasty Atomdyq jáne ener­getıkalyq qadaǵalaý men baqylaý komıteti tóraǵasynyń orynbasary T.Jantıkın vedomstvo aıasynda osy másele tóńireginde atqarylyp jatqan jumystarǵa, elimizdegi Tómen baıytylǵan ýran bankine qatysty qoıylǵan saýaldarǵa jaýap berdi. Láıla EDILQYZY, «Egemen Qazaqstan»