Kemel qoǵam kepili

Táýelsizdiktiń 25 jyldyǵy qarsańynda kelip otyrǵan bıylǵy Kons­tıtýsııa kúniniń orny bólek. Osyǵan oraı Ortalyq kommýnı­ka­sııa­lar qyzmetinde Kons­tıtýsııalyq Keńes Tór­aǵasy Igor Rogov bas­pa­sóz máslıhatyn ótkizdi. Ol BAQ ókilderiniń aldynda Kons­tıtýsııa – memleket zańdy­lyǵy­nyń quqyqtyq irgetasy jáne elimizdiń qarqyndy damýy men turaqtylyqtyń negizi eken­digin aıtty. «Qazaqstan mem­­le­ke­­ttilik­tiń barlyq atrıbýttary­men egemen jáne teń quqyly el retin­de qalyptasty. Halyqtyń ǵasyr­lar boıǵy armany oryndaldy. Qazaq­stan álemdegi básekege qabiletti 50 eldiń qataryna kirdi. Endi aldymyzda «Qazaqstan-2050» Stra­­tegııasyna saı damyǵan 30 el­diń qataryna qosylý maqsaty tur. Osy maqsat-mindetterge jetý jo­lynda bizdiń Konstıtýsııa jan-jaqty jetildirilgen», dedi Igor Rogov. Sonymen qatar ol Negizgi Zań­nyń nyǵaıtýshy róline erekshe nazar aýdardy. Konstıtýsııada respýblıka qyzmetiniń negizin qalaýshy qaǵıdalarǵa elimizdegi patrıotızm jatatynyn málimdedi. «Konstıtýsııalyq patrıotızm Qazaqstan Prezıdenti Nursultan Nazarbaevtyń «Máńgilik El» jalpyulttyq ıdeıasynyń bir bóligi bolyp tabylady. Este­ri­ńizde bolsa, Qazaqstan halqy Assam­bleıasynyń kezekti sessııasynda «Máńgilik Eldiń» jeti berik bóligi negizinde Patrıottyq akt qabyldandy. Olarǵa Táýelsizdik jáne Astana, jalpyulttyq birlik, beıbitshilik pen kelisim, zaıyrly memleket jáne joǵary rýhanııat, Jalpyǵa Ortaq Eńbek Qoǵamy, tarıh, mádenıet jáne til tutastyǵy jatady», deı kele, Keńes Tóraǵasy Negizgi Zańdy qurmetteý konstıtýsıonalızm ıdeıa­lary men qaǵıdalaryna shynaıy berilgendikti talap etedi jáne olardy jappaı ma­quldaý qazaq­standyqtardyń memleket aldyndaǵy bas­ty mindeti ekenin atap ótti. Talǵat RAIYMBEK, «Egemen Qazaqstan»