Elbasy halyqaralyq konferensııa otyrysyna qatysty

Memleket basshysy «Iаdrolyq qarýsyz álem qalyptastyrý» atty halyqaralyq konferensııanyń plenarlyq otyrysyna qatysty. Bul týraly akorda.kz habarlady. Semeı ıadrolyq polıgonynyń jabylǵanyna 25 jyl tolýyna oraı ótken konferensııa jumysyna memlekettik organdardyń, úkimettik emes uıymdardyń, dıplomatııalyq korpýstyń, ǵylym men bilim salasynyń ókilderi, kórnekti qoǵam qaıratkerleri, sondaı-aq álemniń 50-den astam elinen sheteldik qonaqtar qatysty. Elbasy konferensııaǵa qatysýshylarǵa arnaǵan sózinde jahandyq beıbitshilik pen qaýipsizdik úshin Qazaqstan Prezıdenti syılyǵyn taǵaıyndaý týraly kóterilgen bastamaǵa rızashylyǵyn bildirdi. «Jalpy, men bul bastamany qoldaımyn. Múmkin ony Iаdrolyq qarýsyzdandyrý úshin berilgen syılyq dep ataǵan jón bolar, onyń ataýyn qaıta oılastyrý qajet. Biz aqyldasyp, bul syılyqty taǵaıyndaý týraly sheshim qabyldaıtyn bolamyz», – dedi Qazaqstan Prezıdenti. Memleket basshysy 1991 jylǵy 29 tamyzda elimiz úshin de, búkil álem úshin de tarıhı mańyzdy oqıǵa bolǵanyn atap ótti. «Shırek ǵasyr buryn bizdiń jerimiz ben halqymyzǵa 40 jyldaı azap tartqyzǵan mılıtarızmniń eń surapyl synaǵy zańdy túrde toqtatyldy. Bizdiń sheshimimizden keıin barlyq jetekshi ıadrolyq derjavalardyń polıgondarynyń úni shyqpaı qaldy, alaıda olardyń eshqaısysy áli kúnge deıin jabylǵan joq. Qazaqstan – mundaı qadamǵa barǵan alǵashqy el. Bizdiń halqymyzdyń qalaýy solaı boldy. Bul oqıǵanyń barsha álem úshin mańyzdylyǵy osynda», – dedi Nursultan Nazarbaev. Qazaqstan Prezıdenti shırek ǵasyr ishinde bizdiń respýblıkamyz beıbitshilikke, ıadrolyq qarýdan azat bolýǵa bastaıtyn tıimdi modeldi qalyptastyra alǵanyn aıtyp, ony barlyq elde qoldaný jóninde usynys jasady. Memleket basshysy ıadrolyq qarý arqyly ózin-ózi joıý qaýpin azaıtýǵa jáne beıbitshilikti birte-birte demılıtarızasııalaýǵa baǵyttalǵan birqatar usynystar aıta kelip, munyń halyqaralyq qarym-qatynasta tereń mentaldi ózgeristerdi, kóptarapty jańa saıası sheshimderdi, joǵary deńgeıdegi senimdi qajet etetine nazar aýdardy. Sońynda Nursultan Nazarbaev konferensııaǵa qatysýshylar aıtqan usynystar búkil álemdegi saıasatkerler men ǵalymdardyń qulaǵyna jeterine senim bildirip, jınalǵandardyń jumysyna jemis tiledi. Sondaı-aq, is-shara barysynda kún tártibindegi máseleler boıynsha halyqaralyq uıymdar men shet el úkimetteri ókilderi baıandama jasady. Aıdar О́RISBAEV