Eń tańdaýlyǵa – jeńil kólik

Oblysta ataqty veloshabandoz, London Olımpıa­dasynyń jeńimpazy Aleksandr Vınokýrovtyń izbasarlary kóbeıip, sanymen qatar sapalyq quramy da artyp keledi. 1998 jyldan beri 30-dan astam eńbek sińirgen, halyqaralyq dárejedegi jáne Qazaqstannyń sport sheberleri tárbıelengenin, ártúrli jastaǵy ulttyq quramalar sapynda 22 jerlesimizdiń óner kórsetip júrgenin eskersek, óńirde velosporttyń damýyna jan-jaqty jaǵdaı jasalǵanyn baıqaýǵa bolady. Olardyń arasynda álem chempıondary men iri halyqaralyq jarystardyń jeńimpazdary Alekseı Lýsenkonyń, Artem Zaharovtyń, Baqtııar Qojataevtyń esimderi maqtanyshpen atalady. Sońǵy ekeýi Rıo-de-Janeıroda ótken Olımpıadaǵa qatysý qurmetine ıe boldy. Baqtııar «Astana Pro Team» kásibı velokomandasynyń beldi múshesi sanalady. Búgingi kúni velosport mektebinde 300-ge jýyq óren jattyǵady. Jastar saraıynda ótken jıynda «Úzdik oblystyq balalar men jasóspirimder sport mektebi» atalymy boıynsha tańdaýlylar marapattaldy. Birinshi orynǵa olımpıadalyq rezervtiń velosportqa mamandandyrylǵan balalar men jasóspirimder sport mektebi laıyqty dep tanylyp, oblys ákiminiń orynbasary Anarhan Dúısenova aımaq basshysy atynan jeńil kóliktiń kilti men 3 mıllıon teńgeniń sertıfıkatyn saltanatty túrde tapsyrdy. О́mir ESQALI, «Egemen Qazaqstan» Soltústik Qazaqstan oblysy