"Sheshimder oryndalǵanda ǵana sot bedeli artady"

Elbasynyń «100 naqty qadam» – Ult josparynyń 27-qadamynda kóz­­delgen  jeke sot oryndaýshylary ınstıtýtyn odan ári damytý jáne memlekettik sot oryndaýshylary qyzmetin kezeń-kezeńimen qysqar­týdy qamtamasyz etý erekshe mańyzǵa ıe. Osy turǵydan kelgen­de elordada ótken «Sot aktilerin oryndaýdy quqyqtyq turǵy­da qamtamasyz etý jáne jeke sot oryndaýshylar ınstıtýtyn odan ári damytý» taqyrybynda halyqaralyq konferensııanyń ótýi de zańdylyq. Atalǵan sharaǵa Parlament depýtattary, ortalyq memlekettik organdar ókilderi jáne birneshe shet memleketten kelgen halyqaralyq sarapshylar qatysty. Quttyqtaý sózinde Parlament Senaty Tóraǵasynyń orynbasary Bektas Beknazarov bylaı dedi: «Azamattardyń buzylǵan quqyqtaryn qorǵaý jáne qalpyna keltirý sot aktisin oryndaýdyń qısyndy aıaqtalýy bolyp tabylady. Prosesti utqan  jáne óz quqyǵyn sot tártibimen qorǵaǵan adamdar úshin sot sheshimin oryndaýdyń sońǵy nátıjesi mańyzdy. Árbir oryndalmaǵan sot sheshimi búkil sot júıesi jumysynyń tıimdiligine qatysty ádildiktiń saltanat quratyndyǵyna kúmán keltiredi. Sot bedeli onyń sheshimderiniń múltiksiz oryndalýymen qundy Al sot bedeliniń ar jaǵynda memleket bedeli tur». Jeke sot oryndaýshylarynyń quzy­retine memleket múddesi úshin iske asyrylatyn qonys aýdartý, buzý, jer ýchaskelerin alyp qoıýǵa qatysty keıbir erekshelikterdi qospaǵanda, oryndaý qujattarynyń neǵurlym kóp ekendigi de erekshe ataldy. «Sonymen birge, memleket jeke sot oryndaýshylary qyzmetiniń tıimdiligin arttyrý jónindegi qajetti sharalardy jasaýda, jeke derekter týraly zańnamany buzǵany úshin jaýaptylyqty sózsiz  belgileı otyryp, jeke sot oryndaýshylarynyń memlekettik organdardyń aqparattyq júıesine qol jetkizýi de osyndaı maqsat­ty kózdeıdi», dedi Bektas Ábdihanuly. Tóraǵa orynbasary bul rette jeke sot oryn­daýshylary olardyń qyzmetinde kollektorlyq uıymdardyń jaǵymsyz ju­mys tásilderin qoldanýǵa bolmaıtynyn este ustaýy tıistigin de eskerte ketti. Qazirgi kezde elimizde 1286 jeke sot oryn­daýshysy jumys isteýde. Jeke sot oryn­daýshylary ınstıtýtynyń quryl­ǵaly bergi bes jyl ishinde aıtarlyqtaı kórsetkishterge qol jetkizilgen. 2016 jylǵy málimet boıynsha búgingi tańda jeke sot oryndaýshylardyń óndirisinde quny 1,9 trıllıon teńge bolatyn bir jarym mıllıonnan astam atqarý qujaty bar eken. Onyń basym bóligi bank paıdasyna óndirýge qatysty. Al atqarý qujatynyń 70 paıyzy memleket múddesine óndirýmen baılanysty. Bıyl Respýblıkalyq jeke sot oryndaýshylary palatasynyń Halyqaralyq sot oryndaýshylarynyń odaǵyna múshelikke qabyldanyp otyrǵany belgili. Osy turǵydan otyrysta Halyqaralyq sot oryndaýshylar odaǵynyń prezıdenti Fransýaza Andrıe hanym sóz alyp, Uıym quramynda 88 múshe el bar ekendigin tilge tıek ete ketti. Asqar TURAPBAIULY, «Egemen Qazaqstan»