Astana Shveısarııanyń Iаng Boız komandasymen teń tústi

ÝEFA Eýropa lıgasy aıasynda «Astana» fýtbol komandasy óz alańynda Shveısarııanyń «Iаng Boız» komandasymen oınap 0-0 esebimen teń tústi. «Astana» á degennen-aq oıyn tizginin qolyna aldy. Alaıda, Stanımır Stoılovtyń shákirtteri birinshi taımda qarsylastyń qaqpasyna san márte shabýyl jasaǵanmen, gol soǵa almady. Birde Despotovıchtiń shirene tepken doby qaqpa mańdaıshasynan keri ketse, al Nemanıa Maksımovıchtiń baspen soqqan doby dittegen jerine jetpedi. 16-mınýtta Abzal Beısebekovtiń eki qorǵaýshydan sytylyp ótip, oń qaptaldan asyrǵan ádemi dobyna Kabananga laıyqty «jaýap» bere almady. 23-mınýtta shveısarııalyq fýtbolshy Rave áriptesimen ádemi pas almasyp, Erıchpen betpe-bet keldi. Alaıda, onyń asyra salǵan doby qaqpadan asyp ketti. 32-mınýtta №7 nómirli Sýleımanı shamamen 30-metrdeı jerden Erıch qorǵaǵan qaqpany dál kózdegen, qaqpashymyz eki qolyn tosyp, ázer degende qaıtardy. 40-mınýtta Shomko sol qaptaldan ádemi soqqy jasap, jankúıerdi «ah» urǵyzdy. Dop toǵyzdyqtyń mańynan ketti. Oıynnyń 2-taımynda shabýyldar kóp jasalmady. Oıynnyń 66-mınýtynda Beısebekov oń qaptaldan Maksımovıchke pas asyrǵan, alaıda serb fýtbolshysy dopty yńǵaıyna keltire almady. Al qonaqtardyń 31 nómirli oıynshysy Iýıa Kýbonyń 89-mınýtta jasaǵan joıqyn soqqysy 21 myń jankúıerdi dúr silkintti. Abyroı bolǵanda, dop qaqpanyń ústinen ótip ketti. Osylaısha, kózdi ashyp-jumǵansha 90-mınýt ta óte shyqty. Qorytyndy esep – 0:0. Bir qyzyǵy, «Astana» eýrododa saıysynda óz alańynda qatarynan on kezdesýde jeńilmeı keledi. Sońǵy ret elordalyq ujym «Astana-Arenada» 2014 jyly ıspanııalyq «Vılıarrealdan» 0:3 esebimen jeńilgen edi. Búgingi oıynnyń statıstıkasy: Astana - Iаng Boız - 0-0 Soqqylar 10 – 8 Dál baǵyttalǵany 3 – 2 Buryshtama 3 – 6 Almas Manapov, Egemen Qazaqstan