Jer qoınaýyn paıdalanýshylar úshin jańa salyqtyq jeńildikter usynylýda

QR Ulttyq ekonomıka mınıstrligi jer qoınaýyn paıdalanýshylar úshin jańa salyqtyq jeńildikterdi engizýdi usyndy. Bul týraly búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine salyq salý jáne kedendik ákimshilendirý máseleleri boıynsha ózgerister men tolyqtyrýlar engizý týraly» zań jobasy boıynsha baıandama jasaǵan QR Ulttyq ekonomıka mınıstri Qýandyq Bıshimbaev málim etti. «Zań jobasymen ınvestısııalyq qarjylandyrý boıynsha kommersııalyq kórinis bolmaǵan jaǵdaıda bereshekti esepten shyǵarý kezinde korporatıvti tabys salyǵynan bosatý qarastyrylǵan. Atalǵan zań jobasynda túzetýlerdiń tutas blogy jer qoınaýyn paıdalaný máselesine baılanysty jáne óndirýshi, sondaı-aq resýrstardy qaıta óńdeýshi kompanııalardyń damýyna kedergi bolyp otyrǵan Salyq kodeksindegi sharalardy joıýǵa baǵyttalǵan»,-dedi mınıstr. Budan buryn habarlanǵandaı, «QazMunaıGaz» AQ-men strategııalyq seriktesterdi tartý jolymen jer qoınaýyn paıdalaný jobalary iske asyrylýda. Strategııalyq seriktes úshin talaptardyń biri barlaý kezeńinde «QazMunaıGaz» AQ shyǵystary úlesin qarjylandyrýǵa negizdelgen. Júzege asyrylatyn joba boıynsha kommersııalyq óndirý bolǵan kezde strategııalyq seriktes shyǵyndarynyń úlesin qaıtarý iske asyrylady. Kommersııalyq anyqtaý bolmaǵan kezde «QazMunaıGaz» AQ somany qaıtarýdy eskermeıdi. Osy rette strategııalyq seriktes «QazMunaıGaz» AQ-nyń qaryzyn keshiredi. Bul jaǵdaıda «QazMunaıGaz» AQ-da bereshekti esepten shyǵarýdan kiris paıda bolady jáne ol Salyq kodeksine sáıkes 20 paıyz mólsherinde korporatıvti tabys salyǵymen qamtýǵa jatady. Osy máseleni sheshý maqsatynda tıisti túzetýler engizý usynylyp otyr.