Ipotekalyq qaryzdar qaıta qarjylandyrylady

Ipoteka boıynsha boryshkerlerdiń qaryzdaryn qaıta qarjylandyrý sharasy kútip tur. Bul týraly búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine salyq salý jáne kedendik ákimshilendirý máseleleri boıynsha ózgerister men tolyqtyrýlar engizý týraly» zań jobasy boıynsha baıandama jasaǵan QR Ulttyq ekonomıka mınıstri Qýandyq Bıshimbaev málim etti. «Sonymen qatar qarjylyq sektorǵa salyq salý boıynsha 16 túzetýden turatyn tutas blok qamtylǵan. Onyń ishinde «Qaıta qarjylandyrý baǵdarlamasy» aıasynda ıpotekalyq turǵyn úı zaımdary boıynsha bankter aldynda merzimi ótken bereshegi bar qaryz alýshylarǵa kómek kórsetýge baǵyttalǵan sharalar eskerilgen. Bul óz kezeginde atalǵan baǵdarlamany júzege asyrýdy tejep otyrǵan problemalardy sheshýge jáne halyqtyń áleýmettik álsiz toptarynda jalǵyz baspanasyn saqtap qalýǵa múmkindik beredi»,-dedi Bıshimbaev. Munymen qosa, osy blokta bankterdiń ssýdalyq portfelinde senimsiz qaryz deńgeıin tómendetýge baǵyttalǵan túzetýler qarastyrylǵan. Sondaı-aq qarjylyq qyzmetterdiń tutynýshylaryn qorǵaý sharasyn kúsheıtý eskerilip otyr. Budan bólek, depozıtorlardyń múddelerin qorǵaý deńgeıin arttyrýǵa baǵyttalǵan túzetýler de bar. Jalpy otyrys barysynda palata depýtattary «Qazaqstan Respýblıkasynyń keıbir zańnamalyq aktilerine salyq salý jáne kedendik ákimshilendirý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.