Ishimdik pen temekini qymbattatý týraly zańdy depýtattar qoldady

Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine salyq salý jáne kedendik ákimshilendirý máseleleri boıynsha ózgerister men tolyqtyrýlar engizý týraly» Zań jobasy talqylanyp, depýtattar tarapynan qoldaý tapty, dep habarlaıdy egemen.kz Vaq.kz-ke silteme jasap. Depýttar aldynda baıandama jasaǵan Ulttyq ekonomıka mınıstri Qýandyq Bıshimbaev zańdy qabyldasaq, qosymsha 237 mlrd teńge tabys túsetinin aıtyp sendirdi. Daýys berý kezinde Májilistiń 95 depýtaty jaqtap daýys berdi. «Alkogol ónimderin eksporttaý kezinde qosarlanǵan salyq salýdy boldyrmaý jáne otandyq óndirýshilerdiń básekege qabilettiligin kúsheıtý maqsatynda alkogol ónimderin óndirýge paıdalanylatyn etıl spırti aksıziniń nóldik mólsherlemesin belgileý usynylyp otyr. Reseı men Belarýste de osy tájirıbe qoldanylady», - dedi Qýandyq Ýálıxanuly. Endi bul zań jobasy Parlamenttiń joǵary palatasy Senattan qoldaý taýyp, jyl sońyna deıin Elbasy qol qoıyp jatsa, Qazaqstanda alkogol ónimderi men temeki aksızi aıtarlyqtaı ósedi. 2019 jyly ishimdiktiń 1 lıtri úshin aksız quny 85 paıyzǵa, temekiniń 1000 danasy úshin 74%-ǵa deıin ósedi. Aıta keteıik, mınıstrdiń aıtýynsha, qazirgi kezde 1 lıtr alkogol óniminiń qoldanystaǵy aksız quny 1380 teńge bolsa, 2017 jyly bul kórsetkish 2000 teńgege ósedi. Al 2018 jyly 2275 teńgege, 2019 jyly 2550 teńgege deıin jetedi. Temekiniń 1000 danasyna salynatyn aksız salyǵy 2017 jyly 5000-nan 6200 teńgege deıin artady. Al 2017 jyly 7500 teńgege, 2018 jyly 8700 teńgege deıin jetpek.