Qorǵanys mınıstrligi men Bas shtabtyń quzyretteri keńeıtiledi

Búgin Parlament Májilisiniń jalpy otyrysynda QR Qorǵanys mınıstri Sáken Jasuzaqov «Qazaqstan Respýblıkasynyń keıbir zańnamalyq aktilerine qorǵanys jáne áskerı qyzmet máseleleri boıynsha ózgerister men tolyqtyrýlar engizý týraly» zań jobasyn tanystyrdy. «Eger de qoldanystaǵy zańda Qorǵanys mınıstrligi men Bas shtabta búginde, sáıkesinshe 27 jáne 17 ókilettik bar, al osy zań jobasynda biz 51 jáne 35 ókilettikti qarastyryp otyrmyz. Qosymsha qyzmetter búginde usynylyp otyrǵan toptarǵa sáıkes kelip otyr. Mysaly, Qorǵanys mınıstrligi fýnksııalaryna áskerı qaýipsizdik salasynda aqparattyq keńistiktiń monıtorıngisin jáne óziniń quzyreti sheginde qaýip-qater kózderine qarsy is-qımyldy engizip otyrmyz»,-dedi mınıstr. Onyń sózine qaraǵanda, zań jobasynda Qarýly Kúshterde ekologııalyq qaýipsizdikti qamtamasyz etý boıynsha Qorǵanys mınıstrliginiń erejelerdi bekitýi qarastyrylǵan. Buryndary bul qyzmet vedomstvo fýnksııalarynda bolmaǵan edi. Jasuzaqovtyń aıtýynsha, zańnama «jaýyngerlik qabilettilik», «arnaıy operasııalar», «óńirlik áskerler», «qorǵanys zertteýleri» sekildi jańa uǵymdarymen tolyqtyryldy. Zań jobasynyń negizgi maqsaty qorǵanys jáne áskerı qyzmet salasyndaǵy qoǵamdyq qatynastardy retteýge negizdelgen. «Qazaqstan Respýblıkasynyń qorǵanysy jáne Qarýly Kúshteri týraly», «Áskerı qyzmet jáne áskerı qyzmetshilerdiń mártebesi týraly» QR zańdaryna Qorǵanys mınıstrligi men Bas shtabtyń quzyretterin keńeıtýge, áskerı qyzmet ótkerý tetigin jáne aýmaqtyq qorǵanysty uıymdastyrý tártibin jetildirýge baǵyttalǵan ózgerister men tolyqtyrýlar engizilip otyr. Palata depýtattary «Qazaqstan Respýblıkasynyń keıbir zańnamalyq aktilerine qorǵanys jáne áskerı qyzmet máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.