Meıirjan Áshirov erkin kúresten álem chempıony atandy

Jambyl kúres mektebiniń tárbıeshisi Meıirjan Áshirov stýdentter arasynda 65 keli salmaq dárejesindegi álem chempıony atandy. Bul kúnderi túrkııalyq Chorým qalasynda stýdentter arasynda erkin, grek-rım jáne áıelder arasyndaǵy kúres boıynsha jarystar ótip jatyr.  Erkin kúres boıynsha Qazaqstan quramasyna kirgender: Tımýr Aıtqulov (61 kg), Meıirjan Áshirov (65 kg), Azat Saqaev (70 kg), Bolat Saqaev (74 kg), Ádilet Davlýmbaev (86 kg) jáne Baqdáýlet Álmentaı (97 kg). Grek-rım kúresi boıynsha el namysyn Ernur Fıdahmetov (59 kg), Demeý Jadyraev (71 kg) jáne Anton Savenko (130 kg) qorǵaıdy.  Jarystyń birinshi kúni  57, 65, 74, 97 kg salmaq dárejesinde sportshylar erkin kúres boıynsha synǵa tústi. Bul kúni el namysyn qorǵaǵan eki palýannyń biri Meıirjan Áshirov fınalǵa shyqty. Sheshýshi synda Meıirjan Moldavııa ókilimen kezdesip,  matchty 10-7 esebimen óz paıdasyna aıaqtady.  Búgin Chorýmda 61, 70, 86 jáne 125 kg salmaq dárejesindegi sportshylar synǵa túsedi.