Sýsyz jaıylym tıimdilik ákelmeıdi

«Egemenniń» Oral qalasyndaǵy tilshi qosynyna esimi Aqjaıyq aımaǵyna keńinen tanymal aǵa býynnyń ókili, aýyl sharýashylyǵy salasynyń maıtalmany Nurlan Iztileýov keldi. Bul kisini burynnan jaqsy biletinmin. Sondyqtan qashan da eldiń qamyn kóksep júretin jany jaısań aǵaǵa: «Nureke, qandaı máselemen keldińiz? Oı-pikirińizdi tyń­daýǵa ázirmin» dep, izet kórsettim. Ra­syn­da da ol «Egemenge» qara basynyń qamymen emes, respýblıka óńirlerinde jaıylym jerlerdi tıimdi paıdalaný jónindegi usynys-pikirlerin jetkizý úshin kelipti. Onyń aıtqan áńgimesiniń túp-tórkini tómendegideı. Elbasymyz Nursultan Nazarbaevtyń Jer kodeksine ózgerister men tolyq­ty­rý­lar engizý jónindegi zańǵa moratorıı jarııalanýynyń basty bir sebebi – respýblıka óńirlerindegi jaıylym jerlerdi tıimdi paıdalana bilýdiń oń sheshimi tabyla qoımaǵany dep esepteımin. Qazir bul másele jónindegi zań jobasy Májiliste qaralý ústinde. Munyń ózi aýyl turǵyndarynyń kókeıinde júrgen oıdy dóp basqanyna eshqandaı kúmánim joq. О́ıtkeni, olar ózge emes, dál osy zańnyń Parlamentte qabyldanýyn kóp­ten kútip júrgeni de anyq. Áıtse de bul zań óziniń o bastaǵy kózdegen maqsatyna tolyq jete ala ma, joq pa?! Bul saýalǵa birjaqty jaýap qaıtarý qıyn bolyp tur. Nege? Meniń oıymsha aýyl mańyna jaqyn jaıylym jerlerdegi sý kózderi – toǵandar men kólder memleket qaramaǵyna alynýy kerek. Sebebi, sý bolmasa jalań jaıylym eshqandaı tıimdilik ákele almaıdy. Ári sýsyz jaıylymdy durys paıdalanamyn deýdiń ózi bos áńgime bolyp shyǵady. Eger shyndyqtyń kózine týra  qa­raı­tyn bolsaq, kezinde atalǵan sý kóz­de­rin paıdalaný úshin alynǵan gıdro-ınjenerlik  sheshimder qarapaıym turǵyndardyń qamy úshin jasaldy emes pe? Muny umytýǵa bolmaıdy. Osy oraıda aýyl mańyndaǵy sý kózderi aýdan ákimderiniń sheshimimen jalǵa berilip ketkenin  solaqaı sheshim dep qabyldaýǵa máj­búr bolyp otyrmyz. Bul arada artezıan qudyqtaryn qazý – qordalanyp, jınaqtalyp qalǵan máseleni tolyq sheshe almaıdy. Qysqasy, el-jurttyń ıgiligi úshin jasalǵan sý kózderi nysandaryn tekten-tek jalǵa bere salýdyń aqyry áleýmettik ádiletsizdikke bastaıdy. Aı­taıyn degenim «eshten kesh jaqsy» degendeı, halyq tarapynan qoldaý tappaǵan osy sheshimdi túzeý qajet. Tek sondaı jaǵdaıda ǵana aýyl mańyndaǵy sý kózderi halyqtyń ıgiligine aınalar edi. Sonda ǵana ulan-baıtaq el óńirlerindegi aýyl mańyna jaqyn jaıylymdyq jerler – halyq úshin tıimdi ári paıdaly bolady. Álbette, amanatqa qııanat jasaýǵa bolmaıdy. Shalǵaı aýyl turǵyndarynyń janaıqaıyn «Egemenge» jetkize kelgen abyroıly aqsaqaldyń oryndy tilegin Parlament depýtattarynyń nazaryna usynǵandy jón kórdik. Temir QUSAIYN, «Egemen Qazaqstan» Batys Qazaqstan oblysy