Kompanııalar jumysynyń ashyqtyǵyna den qoıady

Astanada Investısııalar jáne damý mınıstrliginiń muryndyq bolýymen ken óndirý salasyndaǵy jumystardy qamtamasyz etý máseleleri boıynsha konferensııa ótti. Konferensııaǵa birqatar mınıstrlikterdiń basshylyq ókilderi, «Kazenergy» qaýymdastyǵynyń, Taý-ken jáne metallýrgııalyq kásiporyndar qaýymdastyǵynyń basshylary, EITI, ıaǵnı Ken óndirý salasy qyzmetiniń ashyqtyǵy bastamasynyń ókilderi qatysty. Ken óndirý salasy qyzmetiniń ashyqtyǵy bastamasy – tabıǵı baılyqtardy basqarýdyń ashyq júrgizilýin, eseptiligin qamtamasyz etetin, sonyń jahandyq standartyn qalyptastyrǵan uıym. Onyń quramyndaǵy 51 eldiń ishinde 31-i tıisti standartqa tolyq jaýap beretin el sanalady. Bul tizimde Norvegııa, Albanııa, Perý, Indonezııa, Qyrǵyzstan syndy eldermen qatar Qazaqstan da bar ekenin aıta ketý kerek. EITI halyqaralyq basqarmasynyń tóraǵasy Fredrık Raınfeldtiń aıtýynsha, Qazaqstan sııaqty jer qoınaýy baı el ken oryndaryn ıgerýde basqalarǵa úlgi bola alady. – Búgingi jıynda biz ken oryndaryn naqty qandaı kompanııalar ıgerip jatqany, olardyń tabysy, eseptiligi týraly máselelerdi sóz ettik. Bul aqparattardyń barlyǵy azamattar úshin ashyq bolýǵa tıis. Azamattar ıgerýshi kompanııalardyń tıisti erejege saı, adamdardyń ıgiligi úshin jumys isteıtininen habardar bolýy kerek, – dedi Fredrık Raınfeld. Elimizde EITI qyzmetin Investısııalar jáne damý mınıstri Jeńis Qasymbek basshylyq jasaıtyn Múddeli taraptar ulttyq keńesi úılestiretinin aıta ketý kerek. Onyń quramynda Parlament Májilisiniń depýtattary, memlekettik organdardyń basshylyq ókilderi, munaı-gaz kompanııalarynyń, taý-ken óndirý sektoryndaǵy kompanııalardyń basshylary, sondaı-aq, azamattyq qoǵam ókilderi bar. Sheshim osy ár sala mamandarynyń ózara kelisiminiń nátıjesinde ǵana qabyldanady. Halyqaralyq standartqa saı, EITI jumysynda bıýdjet kiristeri, negizgi eksport pen ken óndirý kólemi, geologııalyq barlaý derekteri, iri ken oryndarynyń kartasy, áleýmettik ınvestısııalar jáne basqalary kórsetilýge tıis. Osy jıynda aıtylǵandaı, bıylǵy jyly elimizde EITI ıntegrasııasy boıynsha «Meınstrımıng» dep atalatyn qanatqaqty zertteý jumystary qolǵa alynbaq. Bul jobanyń maqsaty Úkimet bergen esepter men EITI esepterindegi esepter men qazir qoljetimdi ashyq málimetterdi qaıtalamaýǵa negizdelgen. Arnur ASQAR, «Egemen Qazaqstan»