Tehnıkalyq daıarlyq tekserildi

Keshe «Almaty Arena» sport kesheniniń alańynda 28-shi Búkilálemdik qysqy Ýnıversıadanyń Ot jaǵý estafetalyq testi ótti. Shara aıasynda uıymdastyrýshylar alaý jaǵýdyń tehnıkalyq daıarlyǵyn tekserip, Ýnıversıadanyń alaý qutysyn jaqty. Sondaı-aq, elimizdiń 15 óńirinen resmı tasymaldaýshy «Eır Astana» kompanııasy arqyly Almatyǵa jetkiziletin 15 alaýdy tasymaldaýǵa arnalǵan arnaıy shyny saýytty testileýden ótkizdi. Estafetalyq testte Ýnı­versıada alaýyn qabyldaıtyn búkil oblys ortalyqtarynyń ókilderi bas qosty. 30-dan asa aımaqtyq menedjer alaý saq­taý­shylarynyń jumysyna baqylaý júrgizdi. Alaý saqtaýshylar – bul kú­sheıtilgen daıarlyq baǵdar­lamasynan ótken 12 adamnan turatyn top. Oqytý baǵdar­lamasynda toptyń qımyl-qozǵalysyn barynsha kórikti ári úılesimdi etýge kómektesetin qoıýshy-rejıssermen jumys jasaý qarastyrylǵan. Taǵy 15 adam Almatyda týra osyndaı daıar­lyqtan ótip, oblystarda jaǵy­latyn alaýmen Almatyǵa ora­lý úshin estafeta ótkiziletin kúni aımaqtarǵa bet alatyn bolady. Ýnıversıada estafetasyna daıarlyq tyńǵylyqty bolýy úshin basty oqıǵanyń baǵdar­lamasy bastan-aıaq qoıylyp shyq­ty. Tek alaýdy jaǵý kezin­de alǵysóz arnaıtyn oblys ákim­deriniń ornyna oıdan shy­ǵarylǵan keıipkerler qatysty. Olar ssenarıı boıynsha jaǵylǵan alaýdy ustap bir shaqyrymǵa sozylǵan joldy júrip ótti. Estafetalyq testtiń taǵy bir mańyzdy bóligi elimiz aımaq­tarynda alaý kóterýshilerdi irikteıtin baıqaýdyń aralyq qorytyndysyn shyǵarýǵa arnalǵan. Joǵary oqý ornynyń árqaısysyna óz irikteýin ózi ótkizý múmkindigi berilgen, olar respýblıkalyq komıssııaǵa on úmitkerdiń tizimin usynýy tıis. Sondaı-aq, Ýnıversıada-2017 saıtynda qalaǵan adamnyń anketany toltyrý arqyly ózin úmitker retinde usynyp irikteýden ótýge múmkindigi bar. Estafetalyq test – Ýnı­ver­sıadanyń baǵdarlamasyndaǵy asa mańyzdy ári eń alǵashqy res­mı sharanyń basty daıarlyq jumysy. Al Ýnıversıada oıyn­darynyń estafetasy 2017 jyl­dyń 25 qańtarynda bastalady. Ýnıversıada alaýy «Nazarbaev Ýnıversıtette» jaǵylyp, artynsha ózge 15 óńirde tutanady. Sońynan barlyq 16 alaý birik­tirilip, Ýnıversıada Alaýy jaǵylady. Melis SEIDAHMETOV   ALMATY