Qaraǵandyda «Saran» shahtasynda tórt kenshi kóz jumdy

Qaraǵandyda «ArselorMıttal Temirtaý» AQ kómir departamentine qarasty «Saran» shahtasynda tótenshe oqıǵa oryn aldy. Apat saldarynan kásiporynnyń tórt birdeı jumysshysy qaza bolyp, beseýi túrli jaraqattarmen aýrýhanaǵa tústi. Aldyńgúni qaza bolǵan kenshiler Murat Nurmaǵambetov, Meıram Janysbaev, Edýard Lesnıkov jáne Mıhaıl Patınniń múrdeleri jer qoınyna berildi. Marqumdardyń báriniń de artynda bala-shaǵalary qaldy. Aldyn-ala belgili bolǵan derekterge sáıkes, shahtadaǵy kezekti aýysymdy jer betine shyǵaryp kele jatqan tirkeme arbashanyń temir arqany úzilip ketip, jumysshylar 200 metr bıiktikten tómen qaraı qulaǵan. Qazirgi tańda osy tótenshe oqıǵaǵa qatysty QR Qylmystyq kodeksiniń 156-bap, 4-tarmaqshasy – «Abaısyzda eki nemese odan da kóp adamnyń ólimine ákep soqqan is-áreket» boıynsha qylmystyq is qozǵalyp, tergeý-tekserý amaldary júrgizilip jatyr. Qaıǵyly oqıǵanyń izin ala Qaraǵandy oblysynyń ákimi Nurmuhambet Ábdibekov qaza bolǵan kenshilerdiń qaraly otbasylaryna baryp, kóńil aıtty. «Sizderdiń qaıǵylaryńyzǵa ortaqtasatyn sózdi tabýdyń ózi aýyr. Bul orny tolmas qaza, aıtyp-jetkizgisiz qaıǵy. Marqumdar týraly jarqyn estelikter árqashanda ajaldan joǵary turmaq. Sizdermen árqashanda birgemiz jáne shyn júrekten qaıǵyryp kóńil aıtamyz», dedi óńir basshysy. «Saran» shahtasyndaǵy qaıǵyly oqıǵanyń sebep-saldaryn anyqtaý boıynsha júrgizilip jatqan tekserý jumystary elimizdiń Premer-mınıstri Baqytjan Saǵyntaevtyń tikeleı baqylaýyna alyndy. Qaırat Ábildınov­ ­ ­ ­ ­ ­