Jaýapsyz júrgizýshiler qala kóshelerin tazalaýǵa kedergi keltiredi

Sońǵy aılary elordada qar kóp jaýdy, kommýnaldyq qyzmetter kúsheıtilgen rejımde jumys isteýde. Birinshi kezekte iri magıstraldar, ortasha kósheler, oramishilik aýmaqtardaǵy qar shyǵarylady, turǵyn úılerdiń aýlalary retke keltiriledi. Tıisti jumystar barysynda áleýmettik nysandarǵa basymdyq beriledi. Bul týraly túngi reıd kezinde Astana qalasy ákiminiń orynbasary Qosman Aıtmuhametov málim etti, dep jazady ákimdiktiń baspasóz qyzmeti. Sharaǵa qatysýshylar elordanyń úsh aýdanyndaǵy birneshe kósheni aralady. Jınalǵan qar táýlik boıy polıgonǵa jáne qar eritetin oryndarǵa shyǵarylady. Bul rette arnaıy tehnıkamen qar jınaýǵa úsh mınýt ýaqyt jumsalsa, polıgonǵa baryp-kelýge orta eseppen bir jarym saǵat ketedi. Kólik qoıý erejelerin buzyp, avtomobılderin qaldyryp ketetin turǵyndar qar jınaýǵa kóp kedergi keltiredi. «Jumysymyzǵa kedergi keltirip turǵan kólikter bolsa, qardy barynsha jınaýǵa tyrysamyz. Jol jumyskerleri tańǵy saǵat 6-dan bastap isteıdi. Biraq aptalap, aılap turatyn da mashınalar bolady. Ondaı kezde sharalar qabyldap, jol polısııasyn shaqyramyz», - dedi Qosman Aıtmuhametov. Onyń aıtýynsha, qazirgi kezde buzýshylyqtar jasaǵany úshin aıyppul sanksııalary qarastyrylǵan jańa abattandyrý erejeleri qalalyq máslıhattyń bekitýine usynyldy. «Turaq oryndaryna qatysty másele pysyqtalýda, memlekettik-jeke menshik áriptestik aıasynda parkıngter salynady. Mysaly, Jeltoqsan, Áýezov, Beıbitshilik kóshelerinde turaqtar bolmaǵandyqtan mashınalar jol boıyna qoıylady, bul da qar jınaý jumystarynyń sapasyna kedergi keltiredi», - deıdi ákimniń orynbasary. Sonymen qatar, PIK-pen ózara áreket etý máselesi de qaraldy. Olar qyzmet kórsetýge tómen tarıf belgileıdi. Mysaly, qalanyń eski bóliginde bul kórsetkish sharshy metri úshin 20-25 teńgeni quraıdy. Bul qarjy tehnıka jaldap, qar shyǵarý úshin jetkiliksiz. «Negizinen, qar qolmen jınalady. Qazirgi kezde oramdar ishinde júrgiziletin jumystardyń jospary ázirlenip jatyr. Qar jınaýǵa kedergi keltirmes úshin turǵyndarǵa kólikterin alyp tastaý týraly habarlanady»,- dedi Qosman Aıtmuhametov. Shara sońynda qala ákiminiń orynbasary kóktemde sý basýdyń oryn almaıtynyna sendirdi – ótken jyldaǵydaı qar túgeldeı shyǵarylady, oramdar ishindegi, skverler men parkterdegi, tipti gúlzarlardaǵy qar jartylaı tazartylady.