«Kenishten» shyqqandar kende qalmaıdy

«El ishi – óner kenishi» degen ras qoı. Aýyl-aımaqtarda qanshama ónerli jastar tabıǵı talantyn jarqyrata almaı, tasada qap jatqany belgili. Bireýinde jaǵdaı joq, taǵy birinde qoldaý joq. Sondyqtan Jambyl jerindegi jańa, jas talant ıelerin anyqtap,  nasıhattaý, olardyń shyǵarmashylyq sheberliginiń shyńdalýyna qoldaý kórsetý maqsatynda bıylǵy jyldyń basynda «Jańa esim-2016» kastıngi jarııalanǵan bolatyn. Estrada, dástúrli oryndaýshylar, mýzyka aspaptary, aıtys aqyndary boıyn­sha ótken bul baıqaýdyń alǵashqy kezeńinde aýyl-aımaqtardan barlyǵy 300-ge jýyq ónerpaz qatysypty. Sonyń ishinen 42 úmitker sýyrylyp shyǵyp, ekinshi kezeńnen keıin jeteýi úzdik dep tanyldy. Mine, osy­laısha Ǵabıt Birimqul (Shý aýdany), Seıilǵazy Táńirbergen (Jambyl aýda­ny), Jansaıa Sársenbaeva (T.Rysqulov aýdany), Amı­­na Ibragımova (Jam­byl aýdany), Ásel Súndet (Jam­byl aýdany), Ádilet Turarov (Taraz), Nurdáýlet Qoıshymanov (Baızaq aýda­ny) arnaıy dıplommen jáne «Jańa esim-2016» ata­lymy belgisimen marapat­taldy. – Bul ánshilerge arnaıy tálimger taǵaıyndalyp, olardy sahnaǵa daıyndaý, repertýar tańdaý, jańa ánderge tapsyrys berý úshin sazger men aqyndar izdestirý, aranjırovka, jańa esimderdiń ımıdjin qalyptastyrý ju­mystaryn atqaratyn bolady, – deı­di Jambyl oblystyq má­denıet, arhıvter jáne qu­jat­tama basqarmasy ha­lyq shyǵarmashylyǵy orta­ly­ǵynyń dırektory Ǵanı Sadyrbaev. «Jańa esim-2016» jeńim­­pazdary arnaıy uıym­das­tyrylǵan gala-konsertte óz ónerlerimen qalyń kórer­menderdi tánti etti. Taǵy bir aıtary, osy joba­ǵa arnaıy «Jańa esim» ánin jazǵan sazger men jeńim­pazdar oryndaǵan jańa ánderdiń avtorlary qonaq re­tinde shaqyrylyp, halyq qoshemetine bólendi. Oralhan DÁÝIT, «Egemen Qazaqstan» Jambyl oblysy