Shymkentte qulaǵan úıde bir jasar sábı besiktiń arqasynda aman qaldy

Arýjan esimdi sábı Shymkentte jarylys saldarynan opyrylyp qulaǵan úıde besiktiń arqasynda tiri qaldy, dep habarlaıdy otyrar.kz saıty. Bir jasar qyz balany úı qırandylarynyń astynda qalyp qoıý qaterinen besik qutqaryp qalǵan. Al úıindilerdiń arasynan besikte jatqan náresteni birinshi bolyp kómekke jetken Rýslan Bahramov alyp shyqqan. Aldyn ala boljamǵa sáıkes, úı gaz-aýa qospasynyń jarylysynan qulaǵan. Jarylys kezinde besiktiń ústine tóbeniń úlken bir bóligi túsken. Besik qańqasynyń joǵarǵy bóligi balany aýyr jaraqattardan saqtap qalǵan. Oqıǵa ornyna jetken jedel járdem qyzmeti balany tekserý úshin aýrýhanaǵa jetkizdi. О́kinishke oraı, Arýjannyń anasyn qutqarý múmkin bolmady. Sabına alǵan jaraqattarynan kóz jumdy. Shymkenttiń Jedel medısınalyq kómek aýrýhanasynda zardap shekken bir adam jatyr, taǵy biri - Kúıik ortalyǵynda. Eske salaıyq, 8 qańtarda shamamen saǵat 03:30-da Shymkent qalasyndaǵy Halyqtar dostyǵy kóshesinde ornalasqan eki qabatty turǵyn úıde gaz ballony jarylyp, baspana opyrylyp qulaǵan bolatyn. Apat ornyna birinshi bolyp, jaqyn mańda turatyn QR Ulttyq ulanynyń qyzmetshisi, starshına Rýslan Bahramov jetti. Oqys oqıǵadan 1988 jyly týǵan Sabına Orynbaeva qaza boldy. Taǵy tórt adam zardap shekti: Qarlyǵash Axanova 1996 jyly týǵan (2 dárejeli kúıik jaraqaty), Ásııa Orynbaeva 1957 jyly týǵan (dene jaraqaty), Dáýren Jumalıev 1985 jyly týǵan (dene jaraqaty), Arýjan Daýylbaı 2015 jyly týǵan (dene jaraqaty).