Bulaq kórseń, kózin ash

Almatynyń shyǵys jaǵynda, sońǵy kezde salynyp jatqan qalanyń shyǵys aınalma jolyna jaqyn jerde, naqtyraq aıtsaq, Ýkraına kóshesi, 45 meken-jaıynda bulaq kózi bar. Halyq ony burynnan jaqsy biledi. Onyń sýy shıpaly sanalady. Tipti sonaý KSRO zamanynda osynda emdeý sanatorııin de sal­maq bolǵan eken degen áńgime bar. Tek sýda emdik bir komponent jetpeı qalady da, emdeý orny sa­lyn­baı qalypty. Báribir jergilikti turǵyndar ony em retinde kóp ýa­qyt paıdalanyp júrdi. Bury­ny­raq­ta, sý qubyrmen kelmeıtin kezde mańyndaǵylar osy bulaqtan sý da ishken. Paıdalanyp qana qoı­maı, bul sý kózin saqtap qalý úshin olar shyn máninde kúresip te keledi eken. Talaı ret qurylys, jol salǵan kezde, ol úı astynda, jol as­tynda qalý qaýpi týǵanda, turǵyndar óre turyp, qarsylyq bildiripti. Qurylysshylar kóp­shiliktiń ótinishine qulaq asyp, bulaqty aınalyp ótken kórinedi. Qalaı bolǵanda da, naqty bireý ıe bolmaǵandyqtan, bulaq­tyń kúıi kete bastaǵan. Beısaýat adamdar odan sý iship qana qoı­maı, basynda dem alyp, qoqystar tastap, ábden ybyrsytqannan keıin, oǵan jurt nazar aýdarýdy da qoıypty. Osy jaıdy kórgen prezıdenttikke kandıdat, «Ta­bı­ǵat» ekologııalyq odaǵynyń tór­aǵa­sy Mels Eleýsizov bulaq basyna ózi kelip, ony qoqystan tazartýdy ózi bastap qolǵa aldy. – Biz sý qadirin bilmeımiz, bul adamdardy shólge aparyp, sonda biraz ustar ma edi! – dep keıidi ekolog. – Áıt­pese, osyndaı káýsar bulaqqa qoly baryp qaıtip qoqys tastaıdy eken. Prezıdenttikten úmitker jı­nal­ǵan jurtqa bul bulaqtyń taǵ­dy­rymen endi ózi aınalysatynyn málimdedi. Buǵan deıin onyń áli de salynyp jatqan jol astynda qalý qaýpi bar edi. Oǵan jol bermeımiz, dedi ekolog. Turǵyndarmen kezdeskende, «Ta­bıǵat» ekologııalyq odaǵynyń tóraǵasy bul bulaqty tazalaý úlken istiń basy bolatynyn aıtty. Qolǵa alynǵan joba boıynsha, Shyǵys Qazaqstan jáne Almaty oblystarynda júzdegen bulaqtyń kózi ashylyp, olar turǵyndardyń ıgiligine aınalmaq kórinedi. Oǵan qajetti qarajat kózderi de tabylǵanǵa uqsaıdy. «Qazaqmys» korporasııasy kómek beretinin málimdep úlgeripti. Bulaq kózin ashý, ony qam­qor­lyq­qa alý jeke bir adamdardyń, tipti ol prezıdenttikten úmitker bolsa da, isi emes, kópshilik halyq bolyp qolǵa alatyn-aq is. Bul jerde bas ekologymyz Mels Ham­za­uly­nyń ónegesi sol halyqqa úlken qozǵaý salatyn shyǵar dep oılaımyz. Mamadııar JAQYP, Almaty.