Qarapaıym jannyń muń-muqtajy eskerilse deıdi

Astanada Kommýnıstik halyqtyq partııasy atynan prezıdenttikke kandıdat J. Ahmetbekov TDM óńirinen kelgen baıqaýshylar mıssııasynyń ókilderimen kezdesý ótkizdi. Kún ótken saıyn atalǵan partııa ókiliniń saılaýaldy kestesi tyǵyzdala bastapty. Ońtústik óńirge jasaǵan saparynan keıin kandıdat TMD tarapynan kelgen baıqaýshylar mıssııasy je­tek­shisiniń orynbasary Oleg Kýlebamen kezdesti. Qazaqstannyń Kommýnıstik halyqtyq partııasy saılaýaldy shtabynda ótken kezdesýde O. Kýleba Dostastyq elderi baıqaý­shy­larynyń atqarǵan jumys­ta­ry­na toqtalyp, olardyń bary­syn egjeı-tegjeıli málim etti. Qazirgi tańda Qazaqstanda Mol­dovadan ózge TDM memle­ket­teriniń 425 ókili tirkeýden ótipti. Mıssııanyń aýqymdy tá­ji­rıbesi aıqyndalǵan: olardyń baıqaýshylary túrli elderdiń 57 saılaý úderisine qatysypty. Baıqaýshylar mıssııasy je­tekshisiniń orynbasary Kommýnıstik halyqtyq partııasy óki­li­nen saılaýaldy úderisiniń jaı-kúıi men saılaý zańnama­la­rynyń saqtalýy jóninde óz pikirimen bólisýdi surady. «Bizdiń maqsatymyz – aldaǵy saılaý týraly kóp aqparat jınaý. Bul saılaý nátıjeleriniń durys qo­rytyndylanýy men ol aq­parat­tardyń shyndyqqa sáıkes bolýy úshin qajet»,– dedi O. Kýleba. Al J.Ahmetbekovtiń pikirinshe, kommýnısterdiń úgit-nası­hat materıaldary men olardyń bılbordtarynyń ornalasýyna qa­tysty azdy-kópti kemshilikter saılaýaldy ju­mystardyń al­ǵash­qy keze­ńin­de oryn alypty. Al búginde ondaı zań buzý­shy­lyqtardyń ke­dir-budyry tegistelgen kóri­ne­di. Sondaı-aq, J. Ah­metbekov óziniń saılaýaldy qyzmetteri jóninde aqparat ta­ratyp jat­qan BAQ jumy­syna kóńili tola­tyndyǵyn jetkizdi. Basqosý kezinde kandıdat óziniń Qa­zaq­stannyń ońtústik óńir­lerine jasaǵan saparlary jó­nin­de qysqasha aqpar berip ótti. Onyń aıtýynsha, saılaýaldy naýqan úderisine berilgen ýa­qyt­tyń tapshylyǵyna sáıkes, ol keıbir óńirlerge senim bildirilgen adamdaryn jibergenin, olardyń óz atynan saılaýshylarmen kezdesip júrgenin aıtty. Bir atap óterligi, kommýnıster saılaý­shy-elektoratpen kezdesý bary­syn­da negizgi basymdyq óz arba­syn ózi súıretetin qarapaıym jandarǵa berilgendigin atap ótti. Olar kóp jaǵdaıda aýyldy jerlerde óz násibin ózderi taýyp júrgen azamattar kórinedi. Kom­mýnısterdiń esebi boıynsha, mundaı azamattardyń sany 2 mln. 700 myń adamdy quraıdy. «Olardyń basym kópshiligi kóp jyldardan beri eshqandaı saı­laýǵa qatyspaı kelipti. Sebebi, bul azamattardy bir saýal ǵana mazalaıtyn bolǵan – ol «Otbasymdy qalaı asyrap, baq­sam eken?» degen saýal. Sondyq­tan, kóshede, saýda núktelerinde osyn­daı azamattarmen kezdesý barysynda olardy saılaýǵa kelip, óz kandıdatyna daýys berýge shaqyrdyq. Biz osy arqyly jumysshy azamattardyń, qara­paıym halyqtyń daýystary na­zarǵa ilikse deımiz», – dedi óz sózinde ol. Láıla EDILQYZY. Astana.