Balqan qalamgerleriniń jınaǵy jaryq kórdi

A.Pýshkın atyndaǵy Shyǵys Qazaqstan oblystyq kitaphanasynda Balqan poezııasy men prozasynan syr shertetin «Jarylqa meni, tún» atty jańa jınaqtyń tusaýy kesildi.  Atalǵan kitaptyń jaryqqa shyǵýyna esimi belgili jazýshy, aýdarmashy, Londondaǵy «Abaı úıi» men Halyqaralyq Abaı klýbyn qurýshy, «Ama­nat» halyqaralyq ádebı jýr­nalynyń negizin qalaýshy Rol­lan Seısenbaev uıytqy boldy. Jańa jınaqpen tanystyrǵan ««Kazzinc Holdings» JShS dırektorlar keńesiniń tóraǵasy Nıkola Popovıchtiń aıtýynsha, atalǵan eńbek Nursultan Nazarbaevtyń jyly lebizine ıe bolǵan «Meniń 100 kitabym» serııasymen jaryq kórdi. Qazaq, orys jáne aǵylshyn tilderinde jarııalanatyn bul serııanyń kitaptary demeýshilerdiń kóme­gine súıenedi. «...Aqyl-oı baılyǵy esh­qashan sarqylmaıdy. Jaq­sy kitap sizdiń ómirlik serigińiz bolmaq», dep jazǵan eken Elbasy atalǵan jınaqtyń alǵy­sózinde. N.Popovıch Ser­bııa, Chernogorııa, Bosnııa, Hor­vatııa jazýshylary men aqyndary shyǵarmalarynyń janyna jaqyn ekenin jetkizdi. Onyń ata-anasy burynǵy ıýgoslavııalyq azamattar eken. Ol osy oraıda atalǵan el­der­diń qundylyqtaryn ba­ǵalaı kele, jınaqta barlyq respýblıkalardyń rýhy aı­ryqsha ashyp kórsetilgenin jáne jarııalanǵan mátinder ótken shaqqa degen saǵynysh sezimin oıatatynyn aıtty. – Bul jınaqty HIH-HH ǵasyrdy qamtıtyn burynǵy Iýgoslavııa keńistigindegi jazba ádebıeti qudiretiniń eskertkishi dep baǵalaýǵa bolady, – dedi N.Popovıch. Taǵy bir aıtarymyz, jaqynda jazýshy Rollan Seısenbaev Ka­nadanyń Ernest Hemıngýeı atyndaǵy ádebı syılyǵynyń laýreaty atandy. Bul syılyqqa qazaq qalamgeri «Elder men Kontınentter» atalymy boıynsha álem halyqtarynyń birlik pen yntymaqta jarasymdy ómir súrýleri jolyndaǵy izdeniske umtylǵan shyǵarmashylyǵy úshin laıyq dep tanylyp otyr. Dýman ANASh, «Egemen Qazaqstan» О́SKEMEN