Májiliste zań jobalary qyzý talqylandy

Keshe Palata Tóraǵasy Nurlan Nyǵmatýlınniń jetekshiligimen palatanyń kezekti jalpy otyrysy boldy. Onda birneshe másele qaralyp, depýtattardyń ortalyq atqarýshy organdarǵa arnaǵan birqatar saýaldary jarııalandy. Alǵashqy bolyp «Qazaqstan Respýblıkasynyń Úkimeti men Túrik Respýblıkasynyń Úkimeti arasynda arnaıy maqsattaǵy bólimshelerdiń oqý-jattyǵýlaryn ótkizý kezinde qabyldaýshy taraptyń qoldaý kórsetýi týraly memorandýmdy ratıfıkasııalaý týraly» zań jobasy qaraldy. Qujat jobasy týraly baıandama jasaǵan Qorǵanys mınıstriniń orynbasary Talǵat Muhtarov memorandýmnyń qashan jasalǵanyn, qandaı maqsatty kózdeıtinin jan-jaqty aıtyp berdi. Memorandýmǵa 2016 jyldyń 20 qańtarynda qol qoıylǵan eken. Ol oqý-jattyǵý ótkizý kezinde qabyldaýshy taraptyń qoldaý kórsetýleriniń negizgi qaǵıdattaryn aıqyndaıdy. Jattyǵýlar qabyldaýshy taraptyń zańnamasyna sáıkes júrgiziledi. Sonyń ishinde qabyldaýshy tarap tómendegideı qoldaý sharalaryn jasaıdy: jattyǵýlar jasaý úshin belgili bir jer aýmaǵyn naqtylaıdy; tehnıka men oq-dárilerdi ákelýge, memleket ishinde alyp júrýge áýe joldary men temir joldardy paıdalanýǵa ruqsat etedi, jattyǵýǵa kelgen jaýyngerlerdi ornalastyrady, as-sýmen qamtamasyz etedi jáne t.b. Qazaqstan áskeriniń mundaı jattyǵýlardy UQShU-ǵa múshe memleketter áskerlerimen de, tipti NATO-ǵa múshe basqa eldermen de ótkizip júrgeni belgili. Alaıda, depýtattar tarapynan baıandamashyǵa naqtylaý maqsatymen óte kóp suraqtar qoıyldy. Sonyń ishinde depýtat Záýresh Amanjolova oqý-jattyǵý kezinde mert bolǵan túrkııalyq jaýynger úshin otbasyna ótemaqy men asyraýshysynan aıyrylǵandyǵyna baılanysty járdemaqyny qaı tarap tóleıdi, eger biz tóleıtin bolsaq, onyń shyǵyny qandaı qordan óndiriledi dep surady. О́kinishke qaraı, mundaı oqıǵalar bizde bolyp turady, degen general tólemaqylar ár eldiń óz zańnamasyna sáıkes tólenetinin jetkizdi. Eger týra bizdiń taraptyń kinásinen osyndaı jaǵdaı oryn alsa, ol bólek sharttarmen retteletin bolady, dedi ol. Depýtat Asqar Bazarbaev bóten el áskerleriniń elimizdiń aýmaǵyndaǵy oqý-jattyǵýǵa qarý-jaraqpen engizilý tártibine nazar aýdaryp, olar arnaıy tekseristen ótkizile me dep surady. Oǵan T.Muhtarov memorandýmnyń negizinen oqý-jattyǵýǵa qoldaý kórsetý máselesin ǵana qarastyratynyn, al bóten el áskeriniń Qazaqstan aýmaǵyna kirgizilýiniń tártibi elimizdiń basqa zańnamalarymen retteletinin aıtty. Depýtat Baqytbek Smaǵul Túrkııanyń aýmaǵynda bolatyn «Anatolııa» áskerı oqý-jattyǵýlaryna Qazaqstan qatysa ma jáne jattyǵýlardyń shyǵyndaryn qaı jaq kóteredi dep surady. Oǵan general Túrkııamen áskerı jattyǵýlar 2006 jyldan bastap eki jaqtyń aýmaǵynda da kezekpen jyl saıyn ótkizilip kele jatqanyn aıtty. Al shyǵyndardy memorandýmǵa sáıkes qabyldaýshy jaq kóteredi eken. Otyrys barysynda memorandýmǵa tikeleı qatysy joq suraqtar da qoıylyp jatty. Bárin qosqanda jalpy sany 11 depýtat osy máseleniń talqylaýyna aralasty. Qosymsha baıandamany Halyqaralyq ister, qorǵanys jáne qaýipsizdik komıtetiniń múshesi Abaı Tasbolatov jasady. Ol memorandýmnyń negizgi máselelerine toqtala kelip, Májilistiń komıtetteri ony oń turǵydan baǵalaıtynyn jetkizdi jáne áriptesterin zań jobasyn qoldaýǵa shaqyrdy. Zań jobasy talqylanyp bolǵan soń biraýyzdan ma­qul­danyp, Senattyń qaraýyna ji­berildi. Ekinshi másele de eki­jaqty jasalǵan kelisimdi ratı­fı­kasııalaýǵa arnaldy. Bul joly «Qazaqstan Úkimeti men Polsha Úkimeti arasyndaǵy Adamdardyń readmıssııasy týraly kelisimdi ratıfıkasııalaý týraly» zań jobasy qaraldy. Bul zań jobasy eki memlekettiń aýmaǵyna zańsyz kelgen, onda bolǵan nemese turyp jatqan ýaǵdalasýshy taraptardyń azamattary, úshinshi memleketterdiń azamattary nemese azamattyǵy joq adamdar readmıssııasynyń quqyqtyq jáne uıymdastyrý máselelerin retteýdi kózdeıdi. Jalpy otyrys barysynda toǵyz depýtat quzyrly organdarǵa saýalyn joldap, memlekettik ındýstrııalyq-ınnovasııalyq damý baǵdarlamasyna qatysatyn kásiporyndar úshin kadr daıarlaý, balalar densaýlyǵy, ekologııa, jylý júıeleri jáne taǵy basqa ózekti máselelerdi kóterdi. Depýtattardyń aımaqtarǵa baryp, eldegi túrli problemalardy óz kózderimen kórip qaıtqandyǵynyń nátıjesi osy jerde aıqyn kórinip turdy. Jaqsybaı SAMRAT, «Egemen Qazaqstan»