Bıznes júrgizýdi jeńildetý jóninde óńirler men qalalar reıtıngi engiziledi

Bizdiń strategııalyq maqsatymyzdyń biri - eldiń ishki jalpy ónimindegi shaǵyn jáne orta bıznestiń úlesi 2050 jylǵa qaraı kem degende 50 paıyz bolýyn qamtamasyz etý. Bul týraly búgin jarııalanǵan Prezıdent Nursultan Nazarbaevtyń Joldaýynda aıtyldy. «Bul - óte órshil maqsat, biraq oǵan qol jetkizýge bolady. Ony oryndaý úshin qazirgi kezeńde mynadaı qadamdar jasalýy qajet. Birinshiden, meniń tapsyrmam boıynsha Úkimet bıyldan bastap Nátıjeli jumyspen qamtý jáne jappaı kásipkerlikti damytý baǵdarlamasyn iske asyrýǵa kirisip ketti. Budan bylaı Qazaqstan azamattary óz bıznesin júrgizý úshin aýylda da, qalada da 16 mıllıon teńgege deıin shaǵyn nesıe ala alady. Shaǵyn nesıe berý aıasyn keńeıtip, kásipkerlerge kepildik jasaý jáne qyzmet kórsetý tetikterin belsendi paıdalaný kerek. Bul sharalardy bıznes júrgizý jáne qarjylyq saýattylyqqa úıretý isin uıymdastyrýmen qatar atqarý kerek», - dep tapsyrdy Elbasy. Prezıdenttiń aıtýynsha, Qazaqstannyń ár óńiri jappaı kásipkerlikti, sonyń ishinde otbasylyq kásipkerlikti damytý baǵytynda keshendi sharalar usynýy kerek. Jańadan ashylǵan jumys oryndarynyń sany - burynǵysha Úkimet pen ákimder qyzmetiniń tıimdiligin baǵalaýdyń negizgi krıterııiniń biri bolady. «Úkimet «Atameken» ulttyq kásipkerler palatasymen (UKP) birlesip, bıznestiń barlyq shyǵynyn jappaı azaıtý jóninde sharalar qabyldaýy qajet. Bul ásirese energetıka, kólik jáne logıstıka, sondaı-aq, turǵyn úı-kommýnaldyq sharýashylyq salalaryndaǵy qyzmet kórsetý qunyna qatysty. Memlekettik qyzmetter kórsetý úderisi meılinshe ońtaılandyrylýǵa tıis. Qujattardyń merzimi men tizbesin qysqartyp, qaıtalanatyn rásimderdi joıý kerek. Bul oraıda adamnyń óziniń barýyn qajetsinbeıtin tolyq elektrondyq formatqa kóshirý kerek. Sondaı-aq, bıznestiń qazirgi qoldanystaǵy retteýshilik júktemesi ósimniń jańa modelin jasaý mindetimen úılespeıdi. Úkimet pen ákimderge bıylǵy 1 shildege deıin bıznesti qaıta retteý jónindegi júıeli sharalar ázirleý mindetin júkteımin», - dep tapsyrdy Elbasy. N. Nazarbaevtyń aıtýynsha, ákimder Úkimetpen birlesip, Dúnıejúzilik bank reıtıngi negizinde óńirlerde bıznes júrgizý úshin jaǵdaıdy jaqsartý jóninde naqty josparlar ázirleý kerek. Osy oraıda elimizde bıznes júrgizýdi jeńildetý jóninen óńirler men qalalar reıtıngin engizý mańyzdy. Bul turǵyda úzdikter úshin arnaýly syılyq taǵaıyndalmaq. Ol jylyna bir ret Indýstrııalandyrý kúninde tabys etiledi.