Ulttyq Olımpıada komıtetiniń 25 jyldyǵyna oraı kúmis monetalar shyǵaryldy

Qazaqstannyń Ulttyq banki 31 qańtarda nomınaly 100 teńgelik, «rroof» sapaly kúmisten QR Ulttyq Olımpıada komıtetiniń 25 jyldyǵyna arnalǵan eskertkish kúmis monetalardy aınalysqa shyǵarady, dep habarlaıdy banktiń baspasóz qyzmeti. Monetanyń bet jaǵynda (aversinde) tómengi bóliginde stadıonnyń stıldendirilgen beınesiniń qorshaýynda Qazaqstannyń eltańbasy, moneta daıyndalǵan metaldy, onyń synamyn jáne salmaǵyn bildiretin «Ag 925  31,1 g» degen jazý jáne soǵylǵan jylyn bildiretin «2017» degen san beınelengen. Sol jaq bóliginde monetanyń nomınalyn bildiretin «100 TEŃGE» degen jazý, joǵarǵy bóliginde Ulttyq banktiń logotıpi beınelengen. Aınaldyra memlekettik tilde «QAZAQSTAN ULTTYQ BANKI» degen oıyńqy jazýy bar. Monetanyń syrt jaǵynda (reversinde) Qazaqstan Respýblıkasynyń Ulttyq Olımpıada komıtetiniń emblemasy jáne «25 YEARS» jazýy beınelengen. Moneta 925 synamdy kúmisten jasalǵan, massasy - 31,1±0,31 g, dıametri - 38,61 mm, taralymy – 1 myń dana. Nomınaldyq quny 100 teńgelik eskertkish monetalar respýblıkanyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq bank shottaryna esepteý úshin jáne aýdarym jasaý úshin qabyldanýǵa mindetti, elimizdiń barlyq bankterinde shekteýsiz usaqtalady jáne aıyrbastalady. Monetanyń dızaıny Qazaqstannyń Ulttyq Olımpıada komıtetiniń jańa ınstıtýsııalyq emblemasyn paıdalana otyryp Qazaqstan Respýblıkasy Prezıdentiniń 2003 jylǵy  25 qyrkúıektegi № 1193 Jarlyǵymen bekitilgen Qazaqstan teńgesi – ulttyq valıýta banknottary men monetalary dızaınynyń tujyrymdamasyna sáıkes ázirlengen. «Monetalardyń búkil taralymyn Qazaqstan Respýblıkasynyń Ulttyq Olımpıada komıteti satyp alady», – delingen habarlamada.