Astanada turǵyn úı baǵasy túbegeıli ózgermeıdi - sarapshy

Qazaqstan qurylys salýshylary qaýymdastyǵynyń sarapshysy Dáýren Aıtkenovtyń oıynsha, aǵymdaǵy jyly Astana qalasynda turǵyn úıdiń baǵasy túbegeıli ózgermeıdi. Al baspanaǵa degen suranys ulǵaıa túsedi, dep habarlaıdy uıymnyń baspasóz qyzmeti. «Búginde elordada turǵyn úıge degen suranys jyl saıyn ósip keledi. 2014 jyldan bastap olsuranystyń kórsetkishi 20 paıyzǵa artyp otyr. Aldaǵy ýaqytta adam sanynyń ósýimen baspanaǵa degen suranys ta arta túsedi. Oǵan «Nurly jer» baǵdarlamasy da óz yqpalyn tıgizedi», - deıdi Aıtkenov. Onyń aıtýynsha, qoljetimdi ıpotekaǵa degen suranys jyljymaıtyn múlik naryǵyndaǵy baǵanyń kóterilýine sebep bolady. Sońǵy jyldary ondaı úrdis anyq baıqalyp otyr. 12 jyldyń ishinde turǵyn úıdiń baǵasy úsh esege ósken. «Al baǵany negizsiz kóterý áreketteri devalvasııa kezinde, ıa bolmasa, naryqtaǵy deldaldar tym kóbeıgende bolady. Máselen, 2015 jyly jeltoqsan aıynda ekinshi ret satylatyn baspananyń bir sharshy metri 468 myń teńgege, 2016 jyly qańtar aıynda jańa úılerdiń baǵasy bir sharshy metri úshin 362 myń teńgege jetken. Osylaısha, baǵanyń negizsiz kóterilýine devalvasııa men dollar baǵamynyń 360 teńgege deıin kóterilýi áser etti. Kóp uzamaı, baǵa óz deńgeıine tústi. Menińshe, aǵymdaǵy jylda turǵyn úıdiń baǵasy turaqty bolady», - deıdi sarapshy.