Abylaı Myrzahmetov kásipkerliktiń damýyna kedergilerdi atady

Indýstrııalyq aımaqtardyń jumysy kásipkerlerdiń kóńilinen shyqpaıdy. Bul týraly búgin BAQ ókilderine baspasóz máslıhatyn ótkizgen «Atameken» Ulttyq kásipkerler palatasy basqarmasynyń tóraǵasy Abylaı Myrzahmetov aıtty, dep habarlaıdy QazAqparat. «Rasyn aıtsaq, kásipkerlerdiń barlyǵy da jergilikti jerde, naqty bir aımaqta qyzmetin jasaıdy. Sondyqtan jergilikti atqarýshy organdardyń kásipkerlikti damytýdaǵy mindeti, jaýapkershiligi Joldaýda naqty aıtylǵan. Osy ýaqytqa deıin kásipkerlikti damytýǵa jergilikti bılik te qatysyp júrdi. Biraq, baıqasańyzdar jergilikti bılik kóbinese áleýmettik salaǵa mán beredi», - dedi ol. Basqarma tóraǵasy osy rette jergilikti kásipkerliktiń damýyna kedergi bolatyn jaıttardy da ashyp aıtty. «Bizdiń ár aýdanǵa deıin fılıalymyz bar. Sondyqtan jergilikti jerlerdegi kásipkerlik jaıynan habardarmyz. Taıaýda Elbasynyń qabyldaýynda bolǵanymyzda da baıan etkenbiz. Jergilikti jerlerdegi kásipkerlerdiń tolǵandyratyn máseleniń biri - jer. Jergilikti jerlerde jer telimderiniń kásipkerlerge esh kedergisiz, qaǵazbastylyqsyz, ashyq, jarııa túrde berilýi álsiz júrýde. О́kinishke qaraı onlaın alańdar durys jumys istemeýde. Ekinshi másele qurylys salýǵa qajet qujattardy alýdaǵy qıyndyqtar bolyp otyr. Munan bólek keıbir salyqtar da bar. Qazir bizde 60-qa jýyq ındýstrııaldyq aımaq jumys isteýde. Biraq olardyń jumystary kásipkerlerdiń kóńilinen shyqpaıdy. Áleýmettik-kásipkerlik korporasııalary bar. Olardyń jumystary da kásipkerler úshin kómeski», - dedi Myrzahmetov. Iаǵnı, onyń paıymynsha, jergilikti ákimdikterdiń qolynda kásipkerlerge sanalýan aýqymdy quraldar bolǵanymen tıimsiz bolyp otyr. «О́tken jyly biz 6 oblysta ilki jobany júzege asyrdyq. Osy rette Qyzylorda, Mańǵystaý oblystary ákimdikterine rızashylyǵymdy bildirgim keledi. Olar káskerlikti damytýǵa bólingen qarjyǵa talaspaı, ony kásipkerler palatasyna berdi. Ol aqshalar 100 paıyzǵa deıin qaıtarylýda. Máselen, Mańǵystaý oblysynda jergilikti bıýdjetten de qarjy bólinip jatyr. Munan shyǵary ár ákimniń reıtıngi bolýy kerek. Biz ekinshi jyl ondaı reıtıng daıyndap, sáýir aıynda jarııalaımyz. Onda 5 sala boıynsha ákimniń atqaryp otyrǵan jumysy baǵalanady», - dedi Myrzahmetov.