Eki oıynda ese jiberdi

Astananyń «Barysy» Qurlyqtyq hokkeı lıgasynyń pleı-off kezeńinde Magnıtogorskide jergilikti «Metallýrg» komandasymen kúsh synasyp, 4:5 esebimen jeńildi. Magnıtogorskide ótken ekinshi oıynda astanalyqtar qarqynyn kúsheıtýge tıisti edi. Sebebi, eki kún buryn ótken alǵashqy kezdesýde Edýard Zankoves shákirtteri jergilikti hokkeıshilerden 0:4 esebimen oısyraı jeńilgen bolatyn. Bul kúni «Barys» baryn sal­ǵanymen, «Metallýrg» birinshi ke­zeńde óz múmkindigin sátti paı­da­lana bildi. Elor­­dalyqtar qarsylastar qaq­pa­syn torýyldap júrgende, olar Danıs Zarıpovke shaı­bany ádemi jetkizip berdi. Ol Hen­rık Karl­s­son­men betpe-bet kel­gende múlt ket­ken joq. Esepti ashty: 1:0. Ekinshi kezeńniń basynda «Barys» hokkeıshileri esepti teńes­tirdi. Roman Starchenko oıynshy­lardyń basymdyǵyn sheber paı­dalana bildi. Kóp uzamaı «Me­tallýrg» hokkeıshileri taǵy da alǵa shyqty. Úsh mınýttan soń Naıd­jel Doýs esepti 2:2-ge jetkizdi. Marten Sen-Per bolsa, «Barystyń» alǵa shyǵýyna múmkindik jasady: 2:3. Úshinshi kezeńde Naıdjel Doýs oıyn erejesin buzyp, «Ba­rys» oıynshylary az kúshpen qor­ǵanýǵa májbúr boldy. Osyny tıimdi paıdalanǵan «Metallýrg» hokkeıshileri elorda klýbynyń qaqpasyna taǵy bir shaıbany toǵytty. Taǵy da Zarıpov kózge tústi. Esep teńesti: 3:3. Sálden keıin sol shtrıh qaı­ta­landy. Taǵy da Naıdjel Doýs, taǵy da Danıs Zarıpov. Birin­shisi aıyp ýaqytyn óteýge máj­búr bolsa, ekinshisi het-trık­tiń avtory atandy. Esep – 4:3. Bir emes, eki márte qarsy­las­tardyń shaıba salýyna aıypty bolǵan Naıdjel Doýs oıyn aıaqtalar tusta janyn sala oınady. Matchtyń bitýine eki mınýt qalǵanda, onyń sol qaptaldan soqqan shaıbasyna qaqpashy Vasılıı Koshechkın sharasyzdyq tanytty. Osylaısha, negizgi kezeń 4:4 esebimen aıaqtaldy. Overtaım degenińiz baq pen sáttiliktiń serik bolýyna baılanysty dúnıe ǵoı. Bul joly ekeýi de alań ıeleri jaǵynda boldy. Sonymen, qorytyndy esep – 5:4 bolyp, Magnıtogorsk komandasynyń enshisine jazyldy. «Metallýrg» qos oıynda da jeńiske jetip, jartylaı fınalǵa bir taban jaqyndady. Al «Barys» jartylaı fınalǵa ótý úshin qalǵan eki oıynda jeńiske jetý kerek. Jalpy, jartylaı fınaldyń taǵdyry 4 jeńis arqyly sheshiledi. «Barys» pen «Metallýrg» komandalary 13 jáne 15 naýryz kúnderi Astanada kezdesetin bolady. Aıan ÁBDÝÁLI, «Egemen Qazaqstan»