22 naýryz kúni barlyq elmen birge qyzylordalyqtar da Naýryz merekesin toılady. Qaladaǵy ortalyq alańda 30 kıiz úı men 6 shatyr tigilip, Astanada ótetin «EKSPO-2017» halyqaralyq kórmesine bılet satyp alýǵa bolatyn kórme pavılony uıymdastyryldy dep habarlaıdy Qyzylorda oblysy ákiminiń baspasóz qyzmeti. Ortalyq alańda ártúrli sporttyq oıyndar men jarystar uıymdastyryldy. Sondaı-aq Naýryz kóje daıyndaý saıysy ótkizilip, aspazdar basty merekelik taǵamdy ázirleý boıynsha sheberlikterin synǵa saldy. Olardyń ónerine kórermender men jalpyhalyqtyq serýenge kelgender qazylyq etti.
Barlyq qala turǵyndary men qonaqtaryna oblys ákimdiginiń shaqyrýymen «TÚRKSOI» túrki mádenıetiniń halyqaralyq uıymynyń ókilderi óner kórsetip, baýyrlas 11 halyqtyń ánderi men bıleri oryndaldy. Qyzylorda oblysynyń ákimi Qyrymbek Kósherbaev ortalyq alańǵa jınalǵandardyń barlyǵyn Naýryz merekesimen quttyqtap, baqyt, birlik pen bereke tiledi.
- Byltyr biz Táýelsizdiktiń shırek ǵasyrlyq mereıtoıyn aýyzbirlikpen atap óttik. Jyldy jemisti qorytyndyladyq. Mereıli jyly Syr eli orasan zor jetistikterge qol jetkizdi. О́ńdeý ónerkásibin damytý jáne turǵyn úı qurylysynyń qarqyny boıynsha oblys respýblıka aımaqtarynyń arasynda kóshbasshylar qatarynda. Tórtinshi jyl qatarynan kúrishten rekordtyq ónim jınap, kúrishshilerimizdi Elbasy arnaıy quttyqtady,- dedi Qyrymbek Kósherbaev.
Sondaı-aq, qyzylordalyqtardy merekelerimen «TÚRKSOI» uıymynyń bas hatshysy, QR burynǵy mádenıet mınıstri Dúısen Qaseıinov quttyqtady. Merekeleý barysynda Qyrymbek Kósherbaev pen Dúısen Qaseıinov eki sábıdiń tusaýyn kesti.
Merekede qyzylordalyqtardy qýantqan taǵy jańalyq, 12 kópqabatty úıden turatyn taǵy bir jańa móltek aýdannyń paıdalanýǵa berilýi. Jańa móltek aýdanda 580 otbasy turatyn bolady.
Budan bólek «Tıtov» shaǵyn aýdanynda apatty jaǵdaıdaǵy úılerdiń ornyna 100 páterlik kópqabatty 2 turǵyn úı salynyp, turǵyndarǵa tabys etildi.
Oblys ákimi Qyrymbek Kósherbaev jańa qonys ıelerin Naýryz merekesimen quttyqtap, qurylysshylarǵa jemisti eńbekteri úshin rızashylyǵyn jetkizdi.
- Elbasy tapsyrmasymen bıyl «Nurly jer» memlekettik baǵdarlamasy iske asyrylady, onyń aıasynda elimizde aldaǵy 15 jylda 1,5 mıllıon otbasyn turǵyn úımen qamtamasyz etý kózdelýde. Bul maqsatty júzege asyrý isinde de Syr eli kóshbasshylar qatarynda bolatyndyǵyna kámil senemiz,- dedi ol. Aıta keteıik, sońǵy 4 jylda Qyzylorda qalasynda jańadan 11 shaǵyn aýdan boı kóterip, 7 myńnan astam otbasy baspanaǵa qol jetkizdi. Qurylys jumystary barysynda 20 myńnan asa adam jumyspen qamtyldy. - Jyl ótken saıyn turǵyndar sanynyń, onyń ishinde jas otbasylardyń qatary artyp kele jatqandyǵy qýantady. Sońǵy 2 jylda bes myńnan asa jup nekege turǵan bolsa, jańa jyldan beri 500-deı jas shańyraq ıeleri otaý qurdy. Bul – qyzylordalyqtardyń óz eline, bolashaqqa jáne Elbasy saıasatyna senimmen qaraıtyndyǵynyń aıqyn belgisi,- dedi oblys ákimi.
Erjan Baıtiles
"Egemen Qazaqstan"
Qyzylorda
