Otyrysta Qazaqstan Respýblıkasynyń Sybaılas jemqorlyqqa qarsy strategııasyn iske asyrý jónindegi 2015 - 2017 jyldarǵa arnalǵan is-sharalar josparynyń jáne «Sybaılas jemqorlyqqa qarsy is-qımyl týraly» zańnyń oryndalý barysy qaraldy. Gúlshara Ábdiqalyqova Memleket basshysynyń tapsyrmasymen Sybaılas jemqorlyqqa qarsy strategııaǵa jáne «Sybaılas jemqorlyqqa qarsy is-qımyl týraly» zańǵa jemqorlyq áreketterdiń aldyn alý isi negiz bolǵanyn atap ótti, dep jazady Aqordanyń resmı saıty.
Jumystyń basty baǵyttary: memlekettik qyzmet salasynda, kvazımemlekettik jáne jekemenshik sektorda, sot jáne quqyq qorǵaý organdarynda jemqorlyqqa qarsy áreket etý, qoǵamdyq baqylaý ınstıtýtyn engizý, sybaılas jemqorlyqqa qarsy mádenıet deńgeıin qalyptastyryp, halyqaralyq yntymaqtastyqty damytý.
Otyrys barysynda Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary A.Shpekbaevtyń baıandamasy tyńdaldy.
Búginde Sybaılas jemqorlyqqa qarsy strategııany iske asyrý jónindegi is-sharalar jospary 95% oryndaldy, ol osy jyly tolyǵymen aıaqtalady.
«Sybaılas jemqorlyqqa qarsy is-qımyl», «Qoǵamdyq keńester týraly», «Aqparatqa qol jetkizý týraly» jańa zańdar qabyldandy. Bul qujattar memlekettik ınstıtýttar qyzmetiniń jarııalylyǵyn jáne olardyń qoǵam baqylaýynda bolýyn qamtamasyz etýge múmkindik beredi.
Jemqorlyqqa qarsy monıtorıng, sybaılas jemqorlyq qaterlerine júıeli taldaý júrgizý, sybaılas jemqorlyqqa qarsy shekteýler, mádenıet pen aǵartý isi sııaqty quqyqtyq tásilder jıyntyǵy tájirıbege keńinen engizildi.
2016 jyly ókiletti organ 156 memlekettik organnyń qyzmetindegi sybaılas jemqorlyq qaterine taldaý jasady, jemqorlyq quqyq buzýshylyqtar jasaýǵa áser etken jaǵdaıattardy joıý jóninde 2 myńnan asa usynys jasaldy.
«Memlekettik organnan memlekettik organǵa», «Ákimdikten ákimdikke» jobalary aıasynda mınıstrlikterde jáne jergilikti atqarýshy organdarda túsindirý jumystaryn júrgizý maqsatymen qyzmetshilermen kezdesýler ótti. BAQ-ta 80-nen astam aıdar ashyldy.
Jemqorlyq úshin belgilenetin jazaǵa qatysty bultartpaý qaǵıdaty saqtalyp otyr. 2016 jyly respýblıkalyq deńgeıdegi – 18, oblystyq deńgeıdegi – 59, qalalyq jáne aýdandyq deńgeıdegi 134 basshy qylmystyq jaýapkershilikke tartyldy. Anyqtalǵan 13,6 mlrd teńge kólemindegi zalaldyń 5,3 mlrd teńge qarjylyq ótemi nemese 39%-y óteldi.
Memlekettik hatshy otyrys qorytyndysy boıynsha Sybaılas jemqorlyqqa qarsy strategııany iske asyrý jóninde kezekti jospar ázirleýdi tapsyrdy.
